Двајцата кандидати за шеф на државата, како и партиите и коалициите, односно кандидатите за пратеници кои ќе учествуваат на парламентарните избори, денеска ќе ги одржат последните митинзи пред стартот на изборниот молк ноќеска на полноќ
Ноќеска на полноќ завршува изборната кампања за двојните избори – вториот круг од претседателските и изборите за пратеници – закажани за в среда, 8 мај.
Двајцата кандидати за шеф на државата, како и партиите и коалициите, односно кандидатите за пратеници кои ќе учествуваат на парламентарните избори, денеска ќе ги одржат последните митинзи пред стартот на изборниот молк ноќеска на полноќ. Молкот ќе трае до затворање на избирачките места на 8 мај во 19 часот.
Кампањата за претседателските избори продолжи веднаш по првиот круг.
Кампањата за парламентарните избори, пак, започна на 18 април и траеше и за време на изборниот молк за претседателските избори и на денот на гласање на 24 април – ситуација која претседателот на Државната изборна комисија (ДИК), Александар Даштевски, неодамна ја нарече уникатна и единствена досега во изборните циклуси.
За последниот ден од изборната кампања најавени се митинзите на дел од учесниците на изборите.
Кандидатот за шеф на државата поддржан од СДСМ, Стево Пендаровски, својот завршен митинг ќе го одржи вечерва на Сквер Јадран во Скопје. Официјално е најавен и завршниот митинг на коалицијата „Вреди“ во Тетово, собирот на Левица во Скопје, како и митинзите на ВМРО-ДПМНЕ во Кривогаштани, Крушево и Прилеп.