Имајќи предвид дека до Собранието беше испратена само информација, а не и документите односно францускиот предлог, Џафери вели дека сите документи се веќе јавно достапни и секој може да ги види. Во меѓувреме, пратеничката група на ВМРО-ДПМНЕ побара да ги добие целосните документи и Џафери да ја врати информацијата до Владата како нецелосна
На редовната понеделничка координација во Собранието ќе се разговара за тоа кога би можело да се одржи пленарната седница за „Информацијата за содржината на предлог – преговарачката рамка за пристапните преговори на Република Северна Македонија со Европска Унија, предложена од страна на претседателството на Франција со Советот на Европска Унија на 30 јуни 2022 година“, што вчера Владата ја испрати до законодавниот дом.
Претседателот на Собранието Талат Џафери за МИА изјави дека за тоа ќе се разговара на координацијата на која како владин претставник ќе присуствува вицепремиерот за евроинтеграции Бојан Маричиќ.
Со оглед дека треба да се одржи и пленарна седница за ребалансот на Буџетот, која може да трае најмногу пет дена, собранискиот спикер посочува дека сепак ако има потреба таа ќе биде прекината и ќе биде закажана нова седница на која на дневен ред би била информацијата за предлог-преговарачката рамка испратена од Владата.
Имајќи предвид дека до Собранието беше испратена само информација, а не и документите односно францускиот предлог, Џафери вели дека сите документи се веќе јавно достапни и секој може да ги види.
Во меѓувреме, пратеничката група на ВМРО-ДПМНЕ побара да ги добие целосните документи, а не само информацијата.
„Како пратеничка група бараме од вас, доколу Владата ги доставила до Собранието овие материјали, истовремено да бидат доставени до нас пратениците, а доколку не се доставени овој предлог да биде вратен до Владата и истите да бидат побарани да се достават заедно со информацијата“,
пишува во барањето од опозициската партија до Џафери.
Според ВМРО-ДПМНЕ, испраќањето само на информација, е уште еден доказ дека Владата го девалвира Собранието и надзорната улога која ја има законодавниот дом и затоа бараат од претседателот на парламентот итно да постапни по нивното барање.
Францускиот предлог напишан на англиски јазик беше објавена на 1 јули на веб-страницата на Владата, а оттогаш започнаа и консултациите на премиерот Димитар Ковачевски со претставници на владината коалиција и опозицијата. На 4 јули, пак, владата го објави предлогот и со официјален превод на македонски јазик.