Кривичниот суд Скопје пред два дена информира дека се одбиени како неосновани приговорите на одбраната на обвинетите за случајот со убиството на 14-годишната Вања Ѓорчевска од Скопје и 74-годишниот Панче Жежовски од Велес и обвинителниот акт се прифаќа во целост
На 30 јули треба да почне судењето за двојното убиство на 14-годишната Вања Ѓорчевска и 74-годишниот Панче Жежовски. Осум месеци по апсењето на групата и одобрувањето на обвинителниот акт, обвинетите ќе се соочат со аргументите на Јавното обвинителство.
Судскиот процес ќе го води судијата Ивица Стефановски, истиот судија кој го водеше процесот за убиството на момчињата кај Смилковското Езеро, познат како „Монструм“, а судеше и за предметите „Пуч“ и „Поткуп“, како и за случајот против „Беса Транс“ чии патници загинаа во несреќа во Бугарија.
Кривичниот суд Скопје пред два дена информира дека се одбиени како неосновани приговорите на одбраната на обвинетите за случајот со убиството на 14-годишната Вања Ѓорчевска од Скопје и 74-годишниот Панче Жежовски од Велес и обвинителниот акт се прифаќа во целост.
„По разгледување и ценење на актот, како и доставените приговори изјавени против обвинението од страна на одбраната на обвинетите, донесе решение со кое приговорите на одбраната се одбиваат како неосновани, а обвинителниот акт се одобрува во целост“,
соопштија од Кривичниот суд.
Во однос на постапката против првоосомничениот за двојното убиство – Љ. П., од Кривичниот суд велат дека сѐ уште е во фаза на обвинителска истрага.
Обвинението беше поднесено на 31 мај против три лица за по две кривични дела убиства и грабнување, како и против таткото на 14-годишното девојче, кој се гони за помагање во грабнувањето.
Во обвинението се вели дека обвинетите, како соизвршители, заедно со уште едно осомничено лице за кое истрагата за исти кривични дела е во тек, испланирале грабнување на 14-годишното дете Вања Ѓорчевска со цел да присилат член на нејзиното потесно семејство да даде парични средства за откуп. На 22.11.2023 година, се додава во обвинението, заеднички извршиле грабнување на оштетениот Панче Жежовски во Велес, со намера да го присилат да им го даде сопственото возило „ситроен“ за да го користат за грабнување на детето во Скопје. Обвинетите отишле до куќата на оштетениот, физички го совладале и го врзале, а потоа го ставиле во багажникот и се упатиле до местото викано Рудник во околината на Велес, каде што од користољубие и на свиреп начин, со умисла го лишиле од живот со огнено оружје – пиштол со калибар 9 милиметри, се додава во обвинението кое тогаш го поднесе Обвинителството.
На 27.11.2023, додаваат од Обвинителство, обвинетите и осомничениот, помогнати од четвртиот обвинет, извршиле грабнување на девојчето во влезот од зграда на улицата „Наум Наумовски Борче” во Скопје.
Откако претходно обвинетиот татко на оштетеното дете, преку првоосомничениот дал упатства за времето кога девојчето ќе излезе само за да оди на училиште, тројцата сега обвинети дошле пред влезот на зградата каде што живее оштетеното дете.
Малолетната Вања Ѓорчевска, која беше пријавена за исчезната на 27 ноември, беше пронајдена мртва во близина на Скопје на 3 декември, кога во близина на Велес беше пронајден мртов и велешанецот Панче, кој, пак, беше пријавен за исчезнат на 24 ноември.
Првоосомничен за убиствата на Вања Ѓорчевска и Панче Жежовски е Љупчо Палевски-Палчо, кој на 15 мај беше екстрадиран во земјава од Турција, каде што по бегството беше лоциран и уапсен по меѓународната потерница што по него ја распишаа македонските власти преку Интерпол.
Обвинети се и Велибор Манев, Боре Видевски и Влатко Кешишов.
Стефан Димовски, пак, е осомничен за кривичното дело помагање сторител по извршено кривично дело бидејќи го возел Палевски од Србија, преку Бугарија до Турција. Нему на 12 март му беше укинат притворот бидејќи, како што образложија тогаш од Обвинителството, поради видот на кривичното дело и предвидената казна, не постои законска можност тој и понатаму да ја издржува оваа мерка за обезбедување присуство.
Меѓу обвинетите е и таткото на убиената Вања, Александар Ѓорчевски, кој по неколку месеци поминати во затворот во Шутка сега се наоѓа во куќен притвор откако Врховниот суд му ја уважи жалбата.