Министерстото за здравство најавува дека разговорите за тоа како ќе се одвива наставата од во новата учебна година ќе продолжат и наредните денови, за да се дојде до најдобро и најбезбедно решение.
Од Министерството потврдуваат дека денеска Комисијата за заразни болести и претставници на Министерството за образование и наука одржаа состанок на кој се дискутирало за здравствените протоколи за реализација на наставата, како и можното започнување на наставата од 1 септември, но дека не се донесени заклучоци во однос на овие прашања.
„Комисијата за заразни болести ги подготви мерките за заштита и потребните протоколи, што треба да се запазат за заштита на децата и наставниците во текот на наставниот процес. Сепак финалната одлука за почеток на учебната година и начинот на одвивање на наставата е во надлежност на Министерството за образование и наука. Разговорите меѓу Комисијата за заразни болести и МОН продолжуваaт утре“,
се вели во соопштението.
Во пресрет на одлуката за тоа како ќе се одвива наставата од 1 септември, во услови на голем број шпекулации, СОНК повика на рационална одлука која ќе значи безбедност на здравјето и на децата и на вработените.
Првиот човек на СОНК Јаким Неделков за „360 степени“ денеска изјави дека одлуката за видот на настава од септември треба да биде гаранција, а не експеримент.
„Голем е ризикот. Имаме две ситуации кои можеби се неспоредливи. Од една страна е безбедноста и здравјето со онлајн настава кое е добитна комбинација, а од друга страна, квалитетот на образовниот процес е со физичкото присуство. Сега да видиме кое е помалото зло во овој момент. На сите родители и наставници не можеме да погодиме, секогаш има аргументи за и против, но ајде да го одбереме помалото зло“,
вели Неделков за „360 степени“.
Во петокот министерот за образование и наука, Арбер Адеми, рече има доволно време до 1 септември навреме да се организира почетокот на учебната 2020/2021 година и сите училишта да се подготват за спроведување на протоколите за трите видови настава во зависност од епидемилошката состојба – со физичко присуство, онлајн-настава и комбинирана.