Министерството за здравство демантира дека Комисијата за заразни болести не дала препорака за отворање на граничните премини. Оттаму велат дека препораката била усвоена на состанок на 22 јуни 2020 година и била доставена до Владата.
„Во врска со објавените написи околу тоа дека Комисијата за заразни болести не препорачала отворање на границите, Министерството за здравство целосно ја демантира оваа информација како невистинита и информира дека на состанокот на Комисијата за заразни болести од 22 јуни 2020 година, Комисијата донесе одлука за препорака за отворање на границите и таа одлука заедно со другите одлуки и препораки за отворање на економски субјекти се доставени до Владата на Република Северна Македонија“,
пишува во соопштението.
Ова прашање се отвори откако на денешната прес-конференција премиерот Оливер Спасовски рече дека одлуката за отворање на граничните премини од петок без никакви ограничувања не била политичка, туку била донесена на предлог на Комисијата за заразни болести.
Порталот СДК.МК, повикувајќи се на извор во Комисијата, објави дека ова тело не предложило конкретен датум за отворање на границите.
На прашање на СДК.мк дали е вистина дека Комисијата за заразни болести на Владата ѝ предложила датум за отворање на границите и аеродромите, без никакви рестрикции, д-р Жарко Караџовски, претседател на Комисијата, кусо одговорил: „За тоа ќе го прашате премиерот“.
Извори од Комисијата за порталот посочиле дека се донесени протоколи за отворање на аеродроми, граници и фитнес-центри, меѓутоа Комисијата не препорачала конкретен датум и за ова прашање било планирано допрва да се разговара. За работата на трговските центри во недела и внатрешноста на угостителските објекти, пак, воопшто не било ни дискутирано, објави СДК.