Македонија во февруари ќе ги добие првите дози на „Фајзер“-вакцината. Денеска попладне постигнат е директен договор со компанијата, а количината ќе биде позната во текот на следните недели, информираат од Министерството за здравство.
Следните дози од вакцината на „Фајзер“ треба да пристигнат во март и април.
„Министерството за здравство продолжува со разговори за обезбедување вакцини и преку преговори со земјите членки на ЕУ, како и преку Ковакс-механизмот од каде се очекува распоредот и датумот за дистрибуција на првите количини. Ова е одлична вест за сите граѓани и прв чекор кон конечна победа над пандемијата“,
се вели во соопштението.
Од Министерството за здравство посочуваат дека во јануари се очекуваат и фрижидерите за складирање на овие вакцини и со тоа, како што велат, македонскиот здравствен систем ќе биде целосно подготвен за вакцинацијата.