За инцидентот во кој, како што објавија дел од медиуми, советник на министерот Наќе Чулев нападнал началник на Единицата за безбедност на сообраќајот во Тетово, информиран е Одделот за внатрешна контрола. Од МВР засега нема детали за учесниците во инцидентот и како дошло до него, но наведуваат дека се работи на расчистување на случајот.
„Денеска во 15:55 часот е пријавен инцидент на улица ’120‘ во близина со крстосницата со улицата ’Борис Кидрич‘ во Тетово. Информиран е Одделот за внатрешна контрола и се работи на расчистување на случајот“,
велат од МВР.
Порталот „Локално“ прв објави видео од инцидентот и, како што наведе, повикувајќи се на очевидци, станува збор за Зоран Ѓорѓиевски-Чикаш, советник на Чулев, кој го напаѓа тетовскиот началник.
На видеото може да се види дека на местото на настанот има уште неколку лица што интервенирале и спречиле да не дојде до поголем инцидент.
