Министерот за внатрешни работи Наќе Чулев денеска информираше за активностите на МВР и посебно на Одделот за специјални полициски операции пред и по воведувањето на вонредната состојба во земјата.
Тој рече дека тие дејствуваат во кризното подрачја за негово обезбедување – спровод на лица од и кон кризното подрачје и контрола на спроведување на мерките од Владата на цела држава.
Од активностите тој го посочи извлекувањето на 66 лица со 24 возила од селата Тресонче, Лазарополе, Осој и Манастирец кои се во периметар на кризниот регион на Дебар и Центар Жупа кои биле изолирани и по контрола на епидемиолог тие се надвор од кризното подрачје.
Исто така, Чулев информираше за активностите на СВР Скопје во приградски населби каде што имало пријави дека лица изнајмуваат викендици и куќи каде што се собираат поголеми групи. Вчеравечер такви контроли биле извршени во Горно Нерези, Сопиште, Сончев Град, Горно и Долно Соње, Марков Манастир, Три Круши, Ченто и Радишани, при што, како што рече, не биле затекнати такви поголеми групи и најави дека ваквите контроли ќе продолжат и во наредните денови.
Во однос на теренските контроли за тоа дали се почитуваат мерките за здравствен надзор и самоизолација, тој информира дека за 17 и 18 март поднесени се пријави против 12 лица: две кривични пријави се во Струмица за дела по член 205 од КЗ за пренесување заразна болест и 10 се за кривични дела по член 206 од КЗ за непостапување по здравствените прописи во услови на епидемија и се однесуваат на Велес и Битола.
Тој не можеше да каже точна бројка на лица за кои се издадени вакви мерки за здравствен надзор и самоизолација бидејќи, како што рече, тој се менува од час во час. До почетокот на прес – конференцијата тој рече дека располагаат со податок за 365 лица под здравствен надзор и околу 1 000 за самоизолација.
Одговарајќи на новинарско прашање за изречените казни за овие лица, Чулев рече дека досега се работи само за парични казни до најмногу 2 500 евра, иако законот предвидува и затворски казни до 3 години.
Чулев информира дека единиците на МВР за спроведување на сите мерки од Владата ќе ги ангажира и припадниците на Единицата за брзо распоредување.