Министерството за внатрешни работи потврди дека денеска во полициска станица повикано е на разговор лицето Ѓ.Г., кој од неговиот личен профил споделил објава од Фејсбук пријател.
Оттаму соопштија дека по извршениот разговор лицето си заминало.
Од МВР не откриваат дали против Ѓ.Г. ќе биде поднесена каква било пријава, додека на социјалните мрежи, во знак на солидарност кон него, повеќе корисници ја споделуваат истата објава.
Зад иницијалите Ѓ.Г. се крие името и презимето на актуелниот директор на ЈУ Зоолошка градина- Скопје, Ѓорги Галетановски.
Тој, како што пишуваа медиумите, објавил фејсбук статус во кој ги повикува симпатизерите на одредена партија, при гласањето да го чкртнат зборот Северна.
Слични статуси, но со споменување на различна партија од онаа која ја акцентира Галетановски и сугестија при гласањето да биде заокружен и зборот Северна, објавиле и други јавни личности, кои засега не се повикани на информативен разговор.
Во изјава за сдк.мк Галетановски вели дека околу 15 часот телефонски бил повикан од единицата за економски криминал да дојде да даде изјава во врска со објавата на Фејсбук.
Таму заминал веднаш со својот адвокат.
„Мојата објава на Фејсбук профил беше шега и тоа им го кажав при давањето изјава. По еден час ми рекоа дека можам да си заминам“,
изјавил Галетановски за сдк.мк.