Знамиња на политичка партија биле забележани во близина на избирачките места во селата Љубанци и Виниче, кои биле отстранети по пријава на избирачките одбори. На неколку избирачки места имало залепено партиски плакати и испишани графити во врска со изборите. Полицијата до 7 часот утринава, односно од отворањето на избирачките места, регистрирала осум настани, од кои шест биле на подрачјето на СВР Скопје.
„Во село Брњарци во близина на избирачко место забележан е плакат на политичка партија, кој бил отстранет од избирачкиот одбор. Во близина на основното училиште ‘Његош’ (каде што има четири гласачки места) испишани биле графити во врска со изборите. Исто така, во близина на пензионерски дом ‘Автокоманда’ (каде што има две гласачки места) биле испишани графити во врска со изборите. Биле известени избирачките одбори и во тек е отстранувањето на графитите. Во 6 часот во Полициската станица Центар било пријавено дека во дворот на основното училиште ‘Никола Вапцаров’, во близина на гласачко место биле забележани плакати од политичка партија, кои биле отстранети од избирачкиот одбор“,
пишува во соопштението од МВР.
Во Полициската станица Гевгелија било пријавено дека во Богданци биле расфрлени повеќе флаери од политичка партија. Додека, пак во СВР Велес било пријавено дека во близина на избирачко место бр. 2135 имало испишани графити во врска со изборите.