Ибраимоски вчера на прес-конференција потврди дека бил повикан во полициска станица во врска со случајот, но, како што рече, не се заканувал, туку преку социјалните мрежи поставил прашања во врска со измените на Законот за облигациони односи
Министерството за внатрешни работи поднесе кривична пријава против лидерот на Партијата за целосна еманципација на Ромите (ПЦЕР), Самка Ибраимоски, за кривично дело загрозување на сигурноста. Како што информираше МВР, Ибраимоски упатил сериозни закани и повици за насилство кон судија на Уставниот суд.
За случајот на својот фејсбук-профил информираше и министерот за внатрешни работи Панче Тошковски кој нагласи дека МВР целосно го расчистило случајот.
„Министерството за внатрешни работи го расчисти случајот со закани кон судија на Уставниот суд. На 24.06.2024 Претседателот на Уставниот суд Д.К., пријави закани по животот и безбедноста на судија од страна на С.И. преку социјална мрежа. По пријавата, МВР презеде мерки и изврши разговор со С.И. во СВР Тетово. На 26.06.2024, Секторот за компјутерски криминал поднесе кривична пријава против С.И. за загрозување на сигурноста според член 144 став 5 од Кривичниот законик“,
напиша Тошковски.
Тој додаде дека МВР во иднина остро ќе реагира против какви било закани, особено против членови на највисокиот суд во Македонија.
Ибраимоски вчера на прес-конференција потврди дека бил повикан во полициска станица во врска со случајот, но како што рече, не се заканувал, туку преку социјалните мрежи поставил прашања во врска со измените на Законот за облигациони односи за кои Уставниот суд пред неколку дена одлучи да поведе постапка и донесе времена мерка за извршување на оспорените законски одредби.
„Јас поставив само едно прашање – што ако настанат убиства? Го пренесов гласот на народот она што ми пишуваат мене во инбокс, каде што кажуваат: ‘ќе земам пиштол’ и ‘ќе отепам некого’ или ‘јас ќе се отепам’. Тоа е мое едно поставено прашање, кој ќе одговара за настанати убиства ако се случат, никакви посебни закани не сум имал кон судиите. Не сум им се заканил ниту на Ана Павловска-Данева ниту на претседателот на судот“,
рече Ибраимоски.