Полицијата го расчисти случајот со лажното јавување во Итна медицинска помош, кое беше снимано и објавен на апликацијата „Тик-ток“ на 13 овој месец. Станува збор за 25-годишно момче од скопско Јурумлери против кое ќе биде поднесена пријава. Видеото со лажниот повик бргу се прошири и на другите социјални мрежи, што предизвика низа негативни реакции кај јавноста поради мајтапењето со медицинските екипи од Брзата помош.
Од МВР информираат дека со лажното јавување и мајтапење, момчето постапило спротивно на Законот за прекршоците против јавниот ред и мир, поточно член 16, бидејќи лажно повикувало на помош и пријавувало настан.
Момчето вчера било повикано во полициска и раскажало дека повикот го направило на 13 септември во 2 часот наутро, додека било во парк во општина Аеродром.