За тоа дали ВМРО-ДПМНЕ веднаш се обраќа кај „Вреди“ за соработка и со тоа ги прескокнува „Европскиот фронт“ предводен од ДУИ, кои имаат освоено повеќе мандати, Муцунски вели дека не се согласува со мислењето дека тие се победникот кај албанското гласачко тело во Македонија
На новинарско прашање дали уставните измени се дел од промените што ги најавуваат и кои ќе бидат во првите 100 дена од новата влада, Муцунски рече дека во делот на евроинтегративниот процес на државата ВМРО-ДПМНЕ јасно во својата програма ги има кажано своите ставови
Потпретседателот на ВМРО-ДПМНЕ, Тимчо Муцунски најави дека првите резултати од идната влада треба да се почувствуваат во првите 100 дена од нејзиниот мандат, затоа што, како што вели тој, „ние нудиме и ќе спроведеме концепт на работа и реализација на ветените проекти“.
Муцунски на денешната прес-конференција го повтори изборниот успех што неговата партија и коалицијата го имаа на вчерашните двојни избори, велејќи дека довербата која ѝ е дадена на ВМРО-ДПМНЕ носи и огромна одговорност и чест да се формира и води влада која, како што рече тој, ќе биде посветена на секој еден граѓанин, на неговите потреби, барања, на подобриот стандард, на реформите кои ќе значат подобар живот.
На новинарско прашање дали уставните измени се дел од промените што ги најавуваат и кои ќе бидат во првите 100 дена од новата влада, Муцунски рече дека во делот на евроинтегративниот процес на државата ВМРО-ДПМНЕ јасно во својата програма ги има кажано своите ставови.
„Ставовите за тоа како треба да се движи решението на прашањето коешто попустливата надворешна политика на Бујар Османи, кој на гугл мапс ќе треба да ја избрише локацијата на Министерството за надворешни работи како негово работно место, не доведоа во непосакувана ситуација која создаде сериозни негативни рефлексии како внатрешно така и надворешно врз државата. Начинот и решението на сите тие проблеми кои тие ги создадоа јасно ги имаме образложено во нашата програма“,
одговори Муцунски.
За тоа дали ВМРО-ДПМНЕ веднаш се обраќа кај „Вреди“ за соработка и со тоа ги прескокнува „Европскиот фронт“ предводен од ДУИ кои имаат освоено повеќе мандати, Муцунски вели дека не се согласува со мислењето дека тие се победникот кај албанското гласачко тело во Македонија.
„Не го делам ставот на самопрокламираниот ’Европски фронт’, кој по своето дејствување и по својата реторика беше антиевропски фронт, но тие одлучија да си го користат тој јазик. Не го делам мислењето дека тие се победникот кај албанското гласачко тело во Македонија“,
рече тој.
Околу идните коалиции и за тоа кога може да се очекува да почнат преговорите, Муцунски рече дека имало и има единствено комуникација со претставниците на „Вреди“. Тој верува дека како што ќе се развива ситуацијата таа ќе добие забрзана динамика, а брзо по инаугурацијата на новиот претседател ќе може да има повеќе информации.
Околу изјавата на министерот за економија во заминување Крешник Бектеши, дадена пред околу еден месец, во која вели дека Мицкоски на 9 мај на „Гугл мапс“ ќе ја бара Мала Речица за формирање влада, Муцунски одговори дека има веројатно многу локации кои Бектеши ќе може да ги побара во иднина и додаде оти е убеден дека на „Гугл мапс“ нема да ја бара локацијата на „Илинденска“, ниту на кој било друг државен орган.
„Таквиот тип на изјави, таквиот тип на дрско однесување, не само од министерот за економија во заминување, туку и од целото раководство на ДУИ и на дел од раководството на СДСМ е причината зошто вчера имаше резултат како што имаше. Тие политички субјекти, токму заради таквото политичко однесување, што го спуштаат нивото на политичката култура на едно, би рекол, примитивно ниво, тоа е причината зошто ќе заминат во опозиција“,
додаде тој.
ВМРО-ДПМНЕ и коалицијата, како што рече Муцунски, доби трипати повеќе мандати од СДСМ, или, ако сакате, повеќе од ДУИ и СДСМ заедно на овие избори.
„Народот јасно покажа дека овие две партии треба да завршат во опозиција. ВМРО-ДПМНЕ, согласно последните неофицијални податоци од ДИК освои 58, наспроти 18 мандати на СДСМ и 19 мандати на ДУИ. Јасна е волјата на граѓаните, покрај СДСМ, во опозиција треба да оди и ДУИ, да поминат низ една катарза, да има одговорност и да се реформираат, потоа да излезат пред судот на граѓаните“,
додаде потпретседателот Муцунски.
Коалицијата „Твоја Македонија“ предводена од ВМРО-ДПМНЕ ја однесе победата на вчерашните парламентарни избори, која, според податоците на Државната изборна комисија (ДИК) објавени утрово на нејзината веб-страница, во моментов се ефектуира со освоени 58 пратенички мандати на државно ниво, врз основа на резултатите од сите шест изборни единици.