На прес-конференцијата, шефицата на бугарската дипломатија Петрова-Чамова, пак, оцени дека има напредок кај земјите од Западен Балкан во процесот на европската интеграција и изрази надеж дека тоа ќе се однесува на сите земји од регионот, вклучително и на Македонија
Еврокомесарката за проширување Марта Кос порача дека за Европската комисија се особено важни градењето доверба и соработката во областите каде што тоа е можно. Според неа, таквата соработка може да отвори простор за поширока соработка, додека регионалната соработка и добрососедските односи се меѓу основите на Европската Унија
Најголема желба на Македонија е нејзиниот пат кон Европската Унија и полноправното членство да бидат засновани на заслугите, а не да бидат оптоварени со историјата и минатото, порача денеска министерот за надворешни работи и надворешна трговија Тимчо Муцунски на заедничката прес-конференција по министерскиот состанок за Коридорот 8 во Софија.
Одговарајќи на прашања за очекувањата од средбата со бугарската министерка за надворешни работи Велислава Петрова-Чамова, Муцунски истакна дека Македонија е целосно усогласена со заедничката надворешна и безбедносна политика на ЕУ и оти со досегашните резултати се покажала како сериозен кандидат за членство.
Тој се осврна и на неодамнешната посета на претседателката на Европската комисија, Урсула фон дер Лајен, на Скопје, посочувајќи дека таа ја пофалила работата на земјата во рамките на Реформската агенда, со поддршка од еврокомесарката за проширување Марта Кос и нејзиниот тим.
Рече дека очекува постигнувањата и досегашните резултати на Македонија да бидат основа за оценувањето кога ЕУ ќе биде подготвена да донесе одлука за нејзиното членство.
„Ние ќе го направиме нашиот дел. Ќе бидеме одговорни, ќе бидеме проактивни во изнаоѓањето решенија за прашањата, но решението никогаш не зависи исклучиво од нашата страна“,
кажа тој.
Според него, проширувањето е политичка одлука што ја носат земјите членки со консензус и порача дека Македонија во односите со соседите и со земјите членки на ЕУ ќе продолжи да се води од добрата волја и почитувањето на меѓународното јавно право.
На прес-конференцијата, шефицата на бугарската дипломатија Петрова-Чамова, пак, оцени дека има напредок кај земјите од Западен Балкан во процесот на европската интеграција и изрази надеж оти тоа ќе се однесува на сите земји од регионот, вклучително и на Македонија.
Посочи дека секторската соработка е важна, но оти за напредок е потребна и континуирана политичка волја.
„Важно е да ја одржуваме секторската соработка, но таа е само еден елемент и важно е политичката волја во оваа насока да продолжи да постои за навистина во следните години да видиме развој и во оваа насока“,
рече таа.
Во однос на средбата со Муцунски, рече дека ја гледа како нормален дел од билатералниот дијалог меѓу двете земји, додавајќи дека довербата треба да се гради преку конкретни чекори и исполнување на преземените обврски.
Еврокомесарката за проширување Марта Кос порача дека за Европската комисија особено важни се градењето доверба и соработката во областите каде што тоа е можно. Според неа, таквата соработка може да отвори простор за поширока соработка, додека регионалната соработка и добрососедските односи се меѓу основите на Европската Унија.
Кос го посочи Коридорот 8 како пример за европски проект и поврзување на земјите, нагласувајќи дека мрежата на поврзаност може да се прошири и кон Романија, Грција, Италија и Косово.
„Многу земји имаат заедничка историја. Добро е што го признаваме тоа, но да гледаме кон иднината и кон она што можеме заедно да го постигнеме“,
порача Кос.
На прес-конференцијата беше отворено и прашањето за случајот со Ива Михаилова, на која ѝ се суди во Кочани за сообраќајна несреќа со смртни последици.
Според Муцунски, во случајот треба да се разграничат правниот и здравствениот аспект. Во однос на правната постапка, посочи дека извршната власт не може да интервенира во одлуките на судските органи, додека здравствениот аспект, додаде дека треба да се разгледува одделно.
Посочи дека Михаилова, која има македонско и бугарско државјанство, во Македонија има право на соодветна здравствена заштита и оти, откако прашањето било отворено од бугарската страна, македонските власти во знак на добра волја понудиле бугарски лекари да ја посетат земјата и да се уверат дека ѝ се обезбедува соодветен здравствен третман.
Бугарската министерка за надворешни работи Велислава Петрова-Чамова по билатералната средба со шефот на македонската дипломатија Тимчо Муцунски во Софија рече дека Бугарија ја поддржува европската перспектива на Северна Македонија и очекува земјата да ги исполни обврските преземени во 2022 година, вклучително и уставните измени.