Со кои градови е збратимен Скопје? Каква е соработка со нив? Дали и со збратимени градови Скопје доби помош во време на глобална пандемија со ковид-19? Какви промени би сакале да видите во главниот град?
Ова се дел од прашањата кои ги упативме до граѓаните и до Градот Скопје по повод денешниот 31 октомври – денот кој со резолуција на Генералното собрание на Обединетите нации е прогласен за Светски ден на градовите.
20 збратимени градови: Колку помогнаа во ковид-кризата?
Градот Скопје е збратимен со 20 градови, во кои влегуваат речиси сите главни градови на Балканот, а на листата се градови и од западноевропските земји, од САД, Кина… Првите градови со кои се збратими градот се Брадфорд во Велика Британија и Дижон во Франција во 1961 година, а последното збратимување било со Сараево во 2017.
Соработката со збратимените градови, нагласуваат градските власти, најчесто е базирана во областа на културата, спортот и образованието, често со размена на ученици и уметници.
На прашањето дали и од кои збратимени градови Скопје добил помош во ковид-кризата и обратно, од Градот го потенцираат кинескиот град Нанчанг.
„Од аспект на помош во време на ковид кризата, во првите недели на истата Град Скопје се обрати до збратимениот град Нанчанг од НР Кина, каде беше побарана помош. Во текот на месец април пристигна помош во вид на 50 000 заштитни маски, кои потоа ги дониравме и дистрибуиравме до здравствените институции“,
велат од Градот.
Во интерактивната мапа која ја подготвивме, во продолжение можете да видите кога и со кои се градови е збратимен Скопје, како и кои соработките кои ги истакнуваат градските власти.
Ги прашавме и граѓаните дали знаат со кои градови е збратимен Скопје. Нивните одговори погледнете ги во видеото во продолжение.
Какви промени сакате во Скопје?
Во анкетата која ја направи „360 степени“, едно од прашањата кои им ги поставивме на скопјани беше и какви промени сакаат да видат во нивниот град во наредните години.
Загадувањето на воздухот, да се подобри сликата во строгиот центар на Скопје каде има повеќе незавршени градби итн., беа дел од одговорите кои ги добивме.
Која е идејата на Светскиот ден на градовите?
31 октомври, како што е објаснето од Обединетите нации, е прогласен за Светски ден на градовите со идеја да се промовира урбанизацијата, да се поттикне соработката помеѓу државите и на тој начин да се придонесе за одржлив урбан развој.
Годинава, Обединетите нации акцентот го ставаат на влијанието на ковид-19 врз урбаниот живот и улогата на градовите во однос на безбедноста на луѓето и одржување на економијата.