Насилството врз деветтоодделенецот, кој, патем, бил и првенец на генерација, како што информира градоначалникот на Општина Градско, се случило во два наврата минатиот месец кога негови двајца соученици во училишната соблекувална за физичко образование му ја искинале долната облека и му нанеле гребаници
Откако информира дека ја разрешил директорката на основното училиште „Даме Груев“, каде што малолетник беше малтретиран од свои соученици, градоначалникот на Општина Градско, Киро Нацков, за МИА изнесе детали во врска со булингот врз ученикот во ова училиште.
Насилството врз деветтоодделенецот, како што информира градоначалникот на Општината, се случило во два наврата минатиот месец, кога негови двајца соученици во училишната соблекувална за физичко образование му ја искинале долната облека и му нанеле гребаници.
Ученикот, кој, патем, бил првенец на генерацијата, и претходно бил малтретиран од истите соученици. Тие му го фрлале училишниот прибор низ прозорците од училиштето, а бил удиран и по главата.
Во изјава за МИА, обвинителката од Основното јавно обвинителство Велес, Гордана Тодорова, вели дека Обвинителството оформило предмет и дека во тек е предистражна постапка за собирање докази по однос на овој настан.
Дел од локалните медиуми пред неколку дена известија дека, сега веќе разрешената директорка на училиштето „Даме Груев“, Таца Дукова, училишниот психолог и наставничкиот совет донеле одлука за изрекување педагошки мерки за намалување на поведението на двајцата ученици што го малтретирале деветтоодделенецот и за преместување во друга паралелка.
Во папката со евидентирани документи од директорката Дукова биле сите записници и документи од преземените активности во врска со инцидентот, како и два записи од двата состанока на наставничкиот совет на училиштето одржани на 18 и 25 ноември.