МПЦ-ОА замолува за достоинствено однесување на погребите на загинатите во пожарот во Кочани

Од МПЦ-ОА велат дека на погребот во Кочани, кој е закажан за 12 часот, ќе чиноначaлствува архиепископот охридски и македонски г. г. Стефан, а со него на опелата ќе сослужуваат и повеќе владици

Од Македонската православна црква – Охридска архиепископија (МПЦ-OA) упатуваат апел за достоинствено и христијанско однесување за време на денешниот ден кога ќе бидат погребите на 59 загинати од пожарот во Кочани.

Од МПЦ-ОА велат дека на погребот во Кочани, кој е закажан за 12 часот, ќе чиноначaлствува архиепископот охридски и македонски г. г. Стефан, а со него на опелата ќе сослужуваат и повеќе владици.

Погреби ќе има на повеќе места, како Скопје, Кочани, Штип, Чешиново-Облешево, Македонска Каменица.

Денеска ќе бидат погребани жртвите од пожарот во дискотеката „Пулс“ во Кочани

Синодот на МПЦ-ОА во неделата по трагедијата соопшти дека иако е невозможно да се најдат човечки зборови за утеха, сепак, утеха на семејствата и блиските, но и на сите нам, нека ни биде верата дека споменот на праведниците е вечен и дека тие вечно ќе постојат во Вечноживиот Бог. 

Порака со сочувство по трагедијата во Кочани до поглаварот на Македонската православна црква – Охридска архиепископија (МПЦ-ОА), г.г. Стефан, упати романскиот патријарх Даниел.

Романскиот патријарх Даниел упати порака со сочувство за настраданите во пожарот во Кочани

Порака со сочувство за трагедијата во Кочани испрати вселенскиот патријарх Вартоломеј до претседателката Гордана Силјановска-Давкова и до брегалничкиот митрополит Иларион. 

И бугарскиот патријарх г. Данаиил оствари телефонски разговор со архиепископот г.г. Стефан, поглавар на Македонската православна црква – Охридска архиепископија (МПЦ-ОА), во кој му изрази сочувство за трагедијата во Кочани. 

Писмо со сочувство до МПЦ-ОА испрати и српскиот патријарх Порфириј. 

Во пожарот во дискотеката „Пулс“ во неделата рано наутро загинаа 59 лица, а 178 се повредени.