Повторно ќе се воведат таргетирани и локализирани рестрикции доколку состојбата со бројот на новозаболени тоа го наложи, но засега ситуацијата само се следи и тоа не се прави поради стабилноста на здравствениот систем и познатите кластери на зараза, изјави министерот за здравство Венко Филипче на денешната прес-конференција, откако последните неколку дена бројот на новозаразени е зголемен.
Официјално: 52 новозаболени со ковид-19, четири лица починаа
Повторно воведување полициски час не е веќе опција, туку евентуални карантински мерки по примерот на Дебар, кои би биле како крајна мерка, но откако ќе се анализираат податоците и од следните неколку дена – во текот на викендот и почетокот на следната недела. Според Филипче, оваа ситуација е една варијација која не би требало да биде тренд.
Тој како специфични општини каде што не се почитуваат мерките ги посочи Тетово и Штип, каде што се направени контроли, а од Скопје тој посочи неколку општини каде бројот на новозаразени е зголемен: Сарај, Чаир, Гази Баба и Аеродром.
За ова денеска е разговарано на седницата на Комисијата за заразни болести и одлуките би се носеле на почетокот на следната недела.
Во Тетово не се почитуваат никакви мерки
Филипче рече дека причина за зголемениот број на заразени овие денови е непочитување на мерките за заштита, односно масовните собирања и притоа не се носат маски. Како посебни примери ги издвои Тетово и Штип каде што по пријави дека не се почитуваат мерките за заштита направени се контроли, при што ситуацијата е загрижувачка.
„Во Тетово не се почитува самоизолацијата, односно генерално не се почитуваат сите мерки, како маски и растојанието, и ова се однесува и на Тетово и на другите околни места“,
рече Филипче.
За Штип тој го посочи примерот со текстилниот погон каде што има 17 заболени и 70 во изолација, а како резултат на непочитувањето на мерките за транспорт и за лична заштита.
„Во автобусите се возат од повеќе конфекции од околните места и притоа не се почитувани мерките за носење маски“,
рече Филипче.
Како што нагласи, голем проблем, кој веројатно придонесува за ваквата бројка, е и тоа што лицата што се во изолација и самоизлоација не ги почитуваат овие мерки и излегуваат и контактираат со други лица. За ова е задолжен Државниот санитарен и здравствен инспекторат, кој ги издава решенијата и треба да ги контролира.
„Исто така, проблем е и несоработката на пациентите со епидемиолозите, односно тие не соработуваат во епидемиолошките анкети и даваат погрешни податоци за адреси за да не им бидат доставени решенијата за изолација и самоизолација“,
рече министерот.
Филипче рече дека зголемениот број на заразени е во период кога во сила биле рестрикции и затоа побара од МВР поголема контрола и санкции за оние што не ги почитуваат.
*Поврзани вести
(ВИДЕО) Една недела по тајно снимената сторија: На улиците уште поголем хаос
(ВИДЕО) 360° тајно снимена сторија: Наместо да казнува, полицијата на „шопинг“ со прекршителите