Украина претходно објави дека околу 400 руски војници биле убиени во ракетниот напад врз окупираната област Донецк во источна Украина. Западните медиуми засега не можат независно да ги потврдат тврдењата на двете страни за бројот на загинати во нападот
Русија денеска потврди висок број на загинати меѓу своите војници во украинскиот ракетен напад врз импровизирана касарна во предградието на окупираниот источен украински град Донецк.
Руското Министерство за одбрана соопшти дека 63 војници загинале во градот Макиевка во делот на украинската област Донецк кој е под контрола на руските сили.
Некои од руските групи сугерираат дека гранатирањето е резултат на напад на Украина со високопрецизен ракетен систем – Химарс.
Украина претходно објави дека околу 400 руски војници биле убиени во ракетниот напад врз окупираната област Донецк во источна Украина.
Западните медиуми засега не можат независно да ги потврдат тврдењата на двете страни за бројот на загинати во нападот.
Според информациите, мета на проектилот била зграда во градот Макиевка каде наводно биле стационирани руските сили.
Вчера вечер во Киев се огласија сирените за воздушен напад, додека Русија продолжува со нападите со беспилотни летала (дронови) и проектили.
Данил Безсонов, висок функционер во окупираните од Русија делови на Донецк, рече дека проектилот ја погодил Макиевка две минути по полноќ на 31 декември.
„Масивен удар беше зададен на стручното училиште од американската МЛРС Химарс“,
изјави тој, мислејќи на проектилите што ги испорачуваат Соединетите држави.
Безсонов во објавата на Телеграм додаде дека има мртви и повредени, но оти точниот број сè уште не е познат.
Голем број руски коментатори и блогери го признаа нападот, но истакнаа дека бројките се помали од оние што ги пријавиле украинските власти.
Според украинската војска, 300 луѓе биле ранети, а околу 400 загинале.
Руската администрација објави дека во регионот на новогодишната ноќ биле истрелани најмалку 25 ракети.
Неколку часа по нападот во Макиевка, Киев се најде под руски оган. Нападот со беспилотни летала и проектили бил насочен кон критичната инфраструктура, изјави регионалниот гувернер на главниот град на Украина, Олексеј Кулеба.
Деветнаесетгодишно момче во Киев е повредено во урнатините по уништено руско беспилотно летало, додаде градоначалникот на главниот град на Украина, Виталиј Кличко.
Украинскиот претседател Володимир Зеленски во својата новогодишна порака и посака на Украина победа и „враќање во нормала“ во 2023 година.
Во своето новогодишно обраќање, претседателот на Русија, Владимир Путин, пак истакна дека „моралната и историската правда“ е на страната на неговата земја.
Русија со месеци ја гаѓа енергетската инфраструктура на Украина, уништувајќи електрани и принудувајќи милиони Украинци секојдневно да се соочуваат со недостиг на електрична и топлинска енергија.