Светската здравствена организација (СЗО) и руските власти разговараат за тестирање на безбедноста и ефикасноста на новата вакцина против ковид-19 одобрена во Русија, соопшти денеска портпаролот на СЗО Тарик Јашаревиќ.
Рускиот претседател Владимир Путин денеска изјави дека Русија, по помалку од два месеци тестирања врз луѓе, станала првата земја во светот што дала регулаторно одобрение за вакцина против ковид-19.
„Контактираме со руските здравствени власти и во тек се разговори за евентуална проверка на безбедноста и ефикасноста на вакцината во рамки на СЗО, но овој процес вклучува ригорозен преглед и проценка на сите потребни податоци за безбедност и ефикасност“,
рече Јашаревиќ на брифинг на ООН во Женева.
Русија ја нарече својата прва одобрена вакцина против ковид-19 „Спутник V“ за странските пазари, што алудира на првиот светски сателит.