Ковачевски посочи дека на патот од независноста до денес нашата света должност, како што кажа, беше да го зачуваме македонскиот идентитет и да ја развиваме функционалната мултиетничност, по која што денес сме препознаени во светот
Мораше да се обединиме за независноста на Македонија во 1991 година, мора да се обединиме и денес за полноправно членство во Европската Унија, порача вечерва премиерот Димитар Ковачевски од централната прослава по повод Денот на независноста – 8 септември.
Премиерот додаде дека искуствата покажуваат оти мораше да се обединиме и кога, како што рече, одлучивме да надвладее разумот и да спречиме проширување на конфликтот во 2001 година.
Мораше да се обединиме, додаде тој, кога ја обновивме демократијата во 2017 година и кога носевме тешки државнички одлуки со кои што Република Северна Македонија, од меѓународно изолирана држава, ја развивме во почитуван и доверлив партнер, членка на НАТО, во 2020 година.
„Денес, мора да сме обединети за да се реализира нашата втора стратешка цел – полноправното членство во Европската Унија. Конечно е тоа можно, по 17 години од добиениот кандидатски статус. Ги отворивме преговорите со Европската Унија.“,
нагласи премиерот.
Ковачевски посочи дека на патот од независноста до денес нашата света должност, како што кажа, беше да го зачуваме македонскиот идентитет и да ја развиваме функционалната мултиетничност, по која што денес сме препознаени во светот.
„Го зачувавме, го потврдивме и го зајакнавме македонскиот идентитет. Македонците и македонскиот јазик се впишани во личната карта на Обединетите нации. Првите документи во Брисел веќе се преведуваат на македонски јазик. Европската Унија нè прифати како Македонци, кои говорат македонски јазик“,
истакна тој.
Во своето обраќање по повод Денот на независноста, премиерот посочи дека сме почитувани и признаени и како држава на богатство од различности, каде граѓаните Македонци, Албанци, Турци, Власи, Срби, Роми, Бошњаци, и сите други, кои живеат во Република Северна Македонија имаат исти права и должности и споделуваат исти демократски вредности, како Европа во мало – и во тоа е и нашата сила и нашата вредност.
„Седнавме на европската маса, затоа што таму ни е местото – бидејќи спроведуваме европски вредности, на дело. Кажавме и ‘Не’ кога требаше и ‘Да’ кога требаше и така ќе биде и во иднина. Дијалошките маси се нашата силна страна. Имавме низ годините многу пријатели и лобисти и аргументи – имаме и денес. Но, на европската маса нас нè немаше. А, сепак и во такви услови, на светот му ја вративме вербата во функционалноста на дипломатијата, преку која што постигнавме решение за долгогодишен исцрпувачки спор. Сега на таа европската маса ние ќе говориме во наше име. Ќе се слушаат и нашите аргументи и ставови – и нашата вистина“,
нагласи Ковачевски.
Премиерот, меѓу другото истакна дека е потребно, но не е доволно, да сме обединети само дома, туку е потребно и обединување во регионот.
„Потребно е да бидеме обединети во Европа. Потребно е да бидеме обединети со демократскиот свет. Бидејќи и овој современ, цивилизациски, технолошки развиен 21 век во кој што живееме, ги покажа своите слабости. Нè испречи: прво пред пандемијата со ковид-19, а потоа и со војната во Украина, која што ретко кој можеше да поверува дека навистина ќе се случи. Европа ги отвори вратите за нас. Дали ќе станеме дел од европското семејство – сега, од нас зависи!“,
порача Ковачевски.
Нагласи оти е потребно одговорно однесување од сите во државата, за да се овозможи забрзана динамика на преговарачкиот процес. На политички план, како што додаде, охрабрувам сите да покажеме достоинствена почит кон предизвиците со коишто се соочени граѓаните и државата од глобалната криза и да се помогне во решенијата, наместо да се блокираат.
„Има време и до избори и за политиканство – но, сега не е тоа време!“,
рече Ковачевски, испраќајќи порака дека „градиме заедничката иднина за нашите деца“.