По седум години, Либерално-демократската партија добива ново раководство, откако единствениот кандидат на осмиот партиски конгрес Моника Зајкова беше избрана како лидер на партијата. Таа, која досега беше потпретседателка, доаѓа на местото на Горан Милевски кој беше на чело на ЛДП од 2015 година.
По изборот од делегатите на конгресот, Зајкова изјави дека Либерално-демократската партија има континуитрт и долго опстојува на политичлката сцена и оти во нејзиниот мандат може да се очекуваат повидливи политики, како и конкретни иницијативи со кои ќе се подобри секојдневното живеење на граѓаните.
„Не сакаме популизам и лажни ветувања за работи кои не можат да се имплементираат, туку мали и јасни иницијативи што водат кон конкретни чекори кои ќе значат подобрување на животот и условите во државата”,
рече Зајкова.
За евентуален влез на Алијанса за Албанците во Владата, во која и ЛДП е коалициски партнер, Зајкова рече очекува да бидат формално известени за тоа од коалициските партнери и дека „ЛДП е отворена за сите прогресивни сили“.
„ЛДП ќе соработува и ќе коалицира само ако тоа е за доброто на државата и граѓаните”,
вели Зајкова.
Во однос на измените на Уставот, рече дека за ЛДП никогаш не било проблем Бугарите што живеат во земјава да бидат внесени во Уставот, но заедно со нив и припадниците на еврејската заедница.
„Бидејќи како либерали секогаш сме се бореле за човековите права и за правото на самоопределување на секој. За нас не е спорно влезот на Бугарите во Уставот, но ќе предложиме и влез на еврејската заедница како дел од народ кој учествувал во креирањето на темелите на оваа држава и учествувале во Народноослободителната борба”,
истакна Зајкова.
На конгресот беа присутни многу домашни и странски гости, а пред неговото одржување, беше организирана регионална либерална конференција „QVO VADIS EVROPA 2022? Поттикнување на проширувањето и интеграцијата на ЕУ“. Од конференцијата беше испратена порака дека земјава нема друга алтернатива, освен членството во ЕУ, како и дека тој пат бара многу работа, но носи и големи придобивки.