Од Министерството порачаа дека образованието и воопшто целиот образовен процес се политички неутрални процеси и надвор од дневните партиски политики и, поради тоа, апелираа до авторот учебникот (Вехби Кадриу) и Педагошката служба да постапат за конкретниот случај согласно Законот за учебници. Коригирањето на содржината, додаваат оттаму, ќе се направи во најкус временски рок
Министерството за образование и наука (МОН) уверува дека ќе биде коригирана содржината од новиот учебник по албански јазик за петто одделение во кој, во лекцијата како правилно се пишуваат кратенки, меѓу другите, како пример се најде и скратеницата ДУИ – Демократска унија за интеграција.
Од Министерството порачаа дека образованието и воопшто целиот образовен процес се политички неутрални процеси и надвор од дневните партиски политики, и поради тоа, апелираа до авторот учебникот (Вехби Кадриу) и Педагошката служба да постапат за конкретниот случај согласно Законот за учебници.
„Членот 14 во законското решение децидно уредува во случај ако се констатира дека во одобрен учебник се потребни одредени исправки или дополнувања, а истите не претставуваат повеќе од 30 отсто од содржината на учебникот, Педагошката служба треба да достави барање до издавачот, односно авторот да предложат исправка или дополнување во текстот на учебникот во рок од 30 дена од денот на добивање на барањето. Барање за дополнување или исправка може да поднесе и самиот автор или издавач“,
велат од МОН.
Откако авторот и Педагошката служба ќе постапат, Министерството, додаваат оттаму, во соработка со операторот кој е избран да ги испечати учебниците, во најкус временски рок и без дополнителни трошоци ќе изврши корекција на увидените пропусти и грешки.
Како и за грешките кои се најдоа во други учебници за основно образование, МОН се огради и за содржината на учебникот по албански јазик за петто одделение во кој се „протна“ ДУИ. Оттаму велат дека Националната комисија е таа која е задолжена да го води процесот на одобрување на учебниците.
„Процесот на одобрување на еден учебник го води Националната комисија за учебници и на истиот во никој случај и од ниеден аспект не влијаат раководните структури на Министерството, ниту пак било кои политички чинители“,
додаваат од МОН.
По неколкунеделните реакции во јавноста за грешките што се најдоа во новите учебници за основно образование, вчера почнаа реакции и за новиот учебник по албански јазик за петто одделение.
Во лекцијата каде што учениците учат како правилно да пишуваат датуми и скратеници на земји или организации чии имиња се состојат од два, три или повеќе збора, меѓу другите, како пример се најде и кратенката ДУИ – Демократска унија за интеграција. Освен оваа, како примери се наведени и кратенките РСМ, САД, МОН и ООН.
По однос на содржината на учебникот, опозициска Алијанса за Албанците (АА), побара учебнико да биде повлечен, а заедно со него, повлекување и на министерот за образование Јетон Шаќири од функцијата.