МОН утре ќе собира податоци колку наставници се вратиле на работа, па ќе одлучи како понатаму

Во врска со заклучокот на штрајкувачите да им се платат само придонесите, министерот Шаќири порача дека тоа е она што го предвидува законот и дека ако СОНК има поинакво решение треба да го каже, па правно-законодавните институции да го разгледаат

Министерот за образование и наука Јетон Шаќири очекува СОНК денеска да одлучи членството да се врати на работи и да се продолжи образовниот процес, но и социјалниот дијалог со Владата. Доколку синдикатот реши да продолжи со штрајкот и да не ја продолжи наставата, МОН утре ќе почне да собира информации дали и колку наставници се вратиле на работа и ќе одлучува како понатаму.

Ваквите пораки од министерот следуваат откако вчера на владина седница се донесе заклучок министерствата за образование и наука и за труд и социјална политика да најдат начин во рамки на законските можности да се продолжи со наставата во школите и згрижувањето дечиња во градинките.

„Ние како МОН ќе ги разгледаме сите законски можности во делот на начинот реализација на наставата. Знам дека и денеска кога разговаравме, дел од наставниците кои беа вклучени во штрајкот, доброволно се вратени. Некои, можеби, не се сите задоволни со понуденото, но заради интересот на децата се вратени во образовниот процес. Утре ќе се собираат податоци за реалната ситуација, потоа ќе видиме. Се надевам дека ќе имаме позитивна одлука само за настава за децата во основните и средните училишта“,

изјави утрово Шаќири.

Враќањето во образовниот процес, повтори министерот, е важно поради роковите за матурантите, но и за сите деца бидејќи тие долг период беа надвор од училишните клупи поради ковид-пандемијата.

Влада: Вработените во школите и градинките ќе добијат плати според предвиденото за време на штрајк

Иако СОНК не се согласи со понуденото покачување од 10 отсто и побара 18 проценти, министерот денеска одговарајќи на прашање во врска со вчерашниот заклучок на Владата со ребаланс на буџетот да се обезбедат пари за само 10 отсто повисоки плати, рече дека таков заклучок е донесен за да има писмен запис со оглед дека синдикатите како една од причините за одбивање на понудата го наведувале и тоа што нема писмен предлог туку само устен.

СОНК утре ќе го анализира ставот на Владата, а во меѓувреме штрајкот ќе продолжи

Во врска, пак, со заклучокот на штрајкувачите да им се платат само придонесите, Шаќири исто како и неговата колешка, министерката за труд и социјална политика Јованка Тренчевска, порача дека тоа е она што го предвидува законот.

„Ако СОНК имаат правно решение за тоа, правно-законодавните институции ќе ја разгледаат секоја можност. За гневот на членството, за тоа треба да се обратите до раководството на СОНК, да се разгледа правниот основ на тоа што го бараат“,

рече Шаќири.

На штрајкувачите ќе им се платат само придонеси, тоа не е закана туку почитување на законот, порача Тренчевска