Министерството за образование и наука (МОН) бара образовните установи во најкус можен рок да обезбедат информации од сите вработени, ученици и студенти – дали во последните две недели патувале или живеат со некој кој патувал во следниве земји/региони: Ломбардија, Венето, Емилија Ромања и Пиемонт во Италија, како и во Кина, Хонг Конг, Иран, Јапонија, Маку, Филипини, Република Кореа, Сингапур и Тајван.
Оттаму велат дека оние кои патувале во некоја од наведените дестинации, не треба да одат на работа или на настава, заради заштита на јавното здравје во услови на брзо ширење на коронавирусот на глобално ниво.
„Лицата кои ќе дадат потврдна информација потребно е да не доаѓаат на работа, односно да не посетуваат настава додека не добијат соодветни инструкции за следни чекори што ќе треба да ги направат, зависно од ситуацијата и од планот на надлежните здравствени институции и Владата. До основните и средните училишта во земјата, универзитетите, јавните научни установи и другите образовни институции, доставени се детални насоки за постапување со цел заштита од евентуално заболување и понатамошно пренесување на овој вирус“,
соопштија од МОН.
Од ресорното министерство велат дека потребно е образовните институции да ја подигнат хигиената на највисоко ниво, во сите простории каде има честа фреквенција на луѓе.
Инаку, денеска се потврди првиот случај на заразен од коронавирус во Македонија. Станува збор за 50-годишна жена која утринава околу 3 часот била хоспитализирана на Инфективната клиника. Според информациите од здравствените власти, жената била во Италија повеќе од еден месец во посета на роднини. Две недели веќе била болна и се лекувала во тамошните болници каде не била тестирана за корона. Во земјава пристигнала со комбе преку граничниот премин Табановце.
Министерот за здравство Венко Филипче вечерва на прес-конференција соопшти дека пациентката е во добра состојба, а останатите патници од комбето, како и возачот се во домашна изолација и под полициски надзор, како што е предвидено во протоколите.
*поврзана вест: Филипче: Заразената пациентка е добро, другите патници се познати и вечерва ќе бидат во домашна изолација
Апелот од надлежните институции е да не се прави паника кај граѓаните и да се применуваат превентивни мерки како избегнување на контакт со лица со симптоми на настинка или грип и често миење на рацете.