Добро е да им ја освежиме меморијата дека токму пред 10-тина години, кога нивни кадри управуваа со министерството, договорите за набавка на учебници беа склучувани после два-три месеци од отпочнувањето на учебните години, велат од МОН
Политичките субјекти кои денеска најмногу критикуваат дека се доцни со набавката и испораката на учебниците за основците и средношколците, всушност најмногу ги кочеа овие процеси кога во минатото раководеа со Министерството за образование и наука (МОН), се вели во денешното соопштение од МОН.
„Добро е да им ја освежиме меморијата дека токму пред 10-тина години, кога нивни кадри управуваа со министерството, договорите за набавка на учебници беа склучувани после два-три месеци од отпочнувањето на учебните години“,
се вели во соопштението.
Од МОН, во прилог на соопштението, испраќаат и договори со издавачките куќи за откуп на учебници кои се правени во 2013-2014 година, а за кои оттаму велат дека се потпишани на 29, 30 и 31 октомври, како и на 4 ноември 2013 година.
„Значи учебници немало во текот на целото прво полугодие истата учебна година. Дополнително, дури кога учебниците биле набавени, истите не се испорачувале до одредени училишта под изговор дека се наоѓаат во далечни подрачја каде патот е ‘лош’, за што постојат и писмени реакции од тогашните училишни раководства“,
се додава во соопштението.
За разлика од тогаш, се наведува во соопштението, денешното раководство на МОН и на другите надлежни институции во врска со набавката на учебници, сите надлежности ги преземаат навремено, многу порано од почетокот на една учебна година.
Учениците, велат од МОН, најголем дел од учебниците ги добиваат пред 1 септември, а мал дел во текот на септември. Нивното доцнење, од МОН велат дека е поради тоа што постапките за нивна изработка и одобрување се пролонгирани од фактори на кои не може да се влијае институционално, односно не зависат од министерството.
„Наместо манипулации со јавноста, потребна е искреност кон граѓаните и најважно, поддршка на заложбите за градење на квалитетно образование. Оние кои се занимаваат со креирање на лаги и шпекулации, време е да почнат да даваат конкретни и конструктивни идеи за модернизација на воспитно – образовниот процес, а ние остануваме отворени за соработка, дискусија и прифаќање на секој предлог кој е изводлив и може да придонесе кон остварувањето на целта“,
додаваат од МОН.