Кампањата за подигнување на свеста за работничките права ќе се одвива во наредните шест месеци преку низа активности
Потребно е зголемување на јавната свест на работниците, младите и работодавачите за нивните права и обврски кои произлегуваат од работниот однос. Познавањето на работничките права е прв чекор кон нивно успешно практикување. Ова е и целта на кампањата „Мој труд, мои права“, која следниве шест месеци преку различни активности ќе понуди детални информации поврзани со работничките права.
Министерката за труд и социјална политика Јагода Шахпаска денеска рече дека е од особена важност што иницијативата за оваа тема доаѓа од Економско-социјалниот совет, кој, како што рече, континуирано работи на подигнување на нивото и на квалитетот на социјалниот дијалог.
Никола Бертолини, од канцеларијата на Европската Унија во Скопје, истакна дека оваа кампања ќе ги информира младите со правата и обврските што произлегуваат од работниот однос и од трудовото законодавство. Тоа, како што рече, е особено важно при вклучувањето на пазарот на труд и засновање на работен однос.
„Предизвиците кои ќе се адресираат во кампањата изискуваат ангажираност и од локалните чинители да се зајакнат и да се информираат младите, да имаат повеќе информации пред или откако ќе најдат работа, за плата, за работно време, отсуства, безбедност и здравје при работа, дискриминација, мобинг, социјална сигурност и решавање на спорови“,
рече Бертолини.
Директорката на Државниот инспекторат за труд Јована Тренческа смета дека оваа кампања е од исклучителна важност, меѓудругото и поради фактот што, како што потенцира, искуството покажало дека превенцијата и информираноста даваат подобри резултати во спречувањето на сивата економија, отколку репресивната политика.
Таа потсети дека сите граѓани кои веќе ги знаат своите права и сметаат дека им се прекршени можат да пријават во ДИТ на телефонскиот број 151-31 и на веб-страницата на Инспекторатот. Пријавата, рече таа, може да биде и анонимна, но посочи дека кога таа ќе се поднесува треба да има точни и прецизни податоци за работодавачот кој се товари дека не ги почитувал правата.
Претседателот на Организацијата на работодавачи Ангел Димитров смета дека треба да има казни за непочитување на правата, но оти треба да бидат соодветни на направената повреда. Согласен е дека многу може да се постигне и со информираноста и на работниците и на работодавачите и оти во тој контекст кампањата е вистински погодок и еден од начините за подобрување на состојбите.
„Работниците ќе се информираат повеќе за своите права, за начинот на функционирање и како да ги бараат тие права, а работодавачите ќе треба да сфатат дека мора да ги почитуваат тие права, како и дека доколку не ги почитуваат ќе си имаат работа и со инспекции или со судови. Работниците не треба да се плашат да ги пријават повредите на правата. Јас мислам дека по надминување на ковид-кризата во Македонија ќе има недостиг на работници. Работодавачите ќе мора да ги подобрат условите за работа и почитувањето на работничките права ако сакаат да ги задржат добрите работници, а тие треба да бидат свесни за тоа и слободно да ги бараат своите права“,
рече Димитров.
Претседателот на ССМ, Дарко Димовски, пак, истакна дека како Синдикат, покрај поддршката што им ја даваат на работниците и се борат за нивните права, се залагаат тие да бидат целосно информирани, оспособени и обучени да знаат како да се изборат за нив.
Кампањата во следните шест месеци ќе ја реализира Економско-социјалниот совет во соработка со проектот на Меѓународната организација на трудот, финансиран од Европската Унија.