Ова вечерва го изјави претседателот Стево Пендаровски појаснувајќи ја неговата изјава претходно во текот на денот кога на новинарско прашање дали размислува за втор претседателски мандат, тој кусо одговори со „не“. Во серија новинарски написи кои денеска беа објавени во медиумите ова „не“ на Пендаровски беше протолкувано како негов одговор дека нема намера да се кандидира
Не знам кој нормален човек, граѓанин на нашава Македонија или политичар најмалку би можел во вакви траорни времиња низ кои поминуваме да размислува за власт, за избори, за мандати. Ова вечерва го изјави претседателот Стево Пендаровски појаснувајќи ја неговата изјава претходно во текот на денот кога на новинарско прашање дали размислува за втор претседателски мандат тој кусо одговори со „не“.
Во серија новинарски написи кои денеска беа објавени во медиумите, ова „не“ на Пендаровски беше протолкувано како негов одговор дека нема намера да се кандидира. Извор од неговиот кабинет, пак, вели дека изјавата била погрешно разбрана, а оти Пендаровски не рекол дека нема повторно да се кандидира за шеф на државата.
Вечерва, пред почетокот на настанот на кој се одбележува 30-годишнина од дипломатските односи меѓу С Македонија и Франција, претседателот во изјава за медиумите кажа дека до изборите има доволно време за размислување за овие работи, а во овој момент, како што кажа, неговите мисли се насочени кон семејствата на починатите Вања Ѓорчевска и велешанецот Панче Жежовски.
„Прашањето на вашата колешка беше дали размислувам за претседателски мандат. Изборите се догодина, закажани се за април и за мај. Имаме доволно време после Нова година да размислуваме за тие работи, но во овој момент моите мисли се насочени кон семејствата на настраданите и се разбира, во рамките на мојата функција да го изработам до крај мандатот во согласност со потребите на граѓаните кои ми ја дадоа честа да ја водам државата пред четири и пол години“,
изјави вечерва Пендаровски.
Мандатот на Пендаровски истекува на 12 мај 2024 година. На изборите во 2019 година тој беше поддржан од коалицијата предводена од СДСМ и од ДУИ.
Во понеделникот на лидерска средба во Собранието беше договорено дека првиот круг на претседателските избори ќе се одржи на 24 април, а вториот круг ќе биде заедно со парламентарните на 8 мај 2024 година.