За сквернавење на бугарски гробишта до бугарското МНР реагирала Фондацијата „Македонија“ по што официјална Софија објави соопштение дека активно ќе работи да го расчисти случајот и обвини дека бугарските споменици во земјава во најголем дел се во многу лоша состојба, како резултат на „конзистентната политика на дебугаризација во минатото на територијата на денешна Република Северна Македонија“
Од нашето МНР, пак, бараат да не се наседнува на шпекулации и очигледни провокации и констатираат дека има тренд на организиран пристап на вакви напади
Спомен-обележјето на загинатите 193 бугарски војници, во близина на трасата за експресниот пат Градско-Прилеп, нема оштетувања, велат од Министерството за надворешни работи (МНР) укажувајќи дека постои тренд на организирано пуштање шпекулации.
„Со утврдената фактичка состојба од надлежните институции, сакаме да ги отфрлиме сите обвинувања кои се појавија во јавноста, притоа и да упатиме апел до сите инволвирани поединци и институции да бидат внимателни и да не наседнуваат на очигледни провокации чија интенција е да ги загрозат добрососедските односи меѓу двете земји, и напорите на двете Министерства за изнаоѓање заеднички решенија за надминување на разликите. Посебно загрижува што трендот на појава на ваквите шпекулации во последно време се интензивира, што покажува дека се работи за организиран пристап на нивна злоупотреба за што сакаме дополнително да предупредиме на внимателност и одговорно однесување“,
велат од МНР.
Реакцијата оттаму доаѓа откако во медиумите се појавија обвинувања дека за сквернавење, а вчера реагираше и бугарското МНР кое обвини дека бугарските споменици во земјава во најголем дел се во многу лоша состојба, како резултат на „конзистентната политика на дебугаризација во минатото на територијата на денешна Република Северна Македонија“.
Од МНР нагласуваат дека откако се појавија обвинувањата Управата за заштита на културното наследство при Министерството за култура и Јавното претпријатие за државни патишта при Министерството за транспорт и врски направиле вонреден увид, но не констатирале оштетувања.
Прво, нагласуваат дека овој споменик не потпаѓа под никаков режим на заштитен споменик или културно наследно, но и без тоа тој не е оштетен. Понатаму, споменикот се наоѓа среде земјоделство земјиште, меѓутоа и во таков случај при обработката на земјиштето тој се заобиколува.
„Трето, споменикот е надвор од предвидениот појас за изведба на трајните работи и не е засегнат од какви било извршени градежни работи и по извршениот увид на терен е констатирано дека е без видливи оштетувања. Ситуацијата на теренот покажува дека во моментов споменикот е физички одделен од трасата на која се изведуваат градежни работи на Експресниот пат Градско – Прилеп со заштитна ограда од времен карактер која ќе биде заменета со трајна заштитна ограда предвидена со Основниот проект за изведба. По изведба на оваа ограда слободниот простор меѓу истата и споменикот ќе биде околу 4 метра. По завршувањето на работите, до споменикот ќе има пристапен простор, со цел тој да биде достапен за заинтересираните посетители“,
велат од МНР.
Исто така, од Министерството нагласуваат дека околу овој споменик нема гробишта или гробни места и не се знае дали нешто било различно во минатото, но на околу 100 метри од овој споменик има второ помало спомен-обележје чија историја не е позната.
Реакција дека се осквернавени два бугарски воени гробници во Северна Македонија, како што вчера наведе во реакцијата бугарското МНР, до бугарските власти испратила Фондацијата „Македонија“ по што оттаму наведоа дека активно ќе работат на разјаснување на фактите и преземање на соодветни мерки. Во истата реакција официјална Софија обвини и дека бугарските споменици во земјава во најголем дел се во многу лоша состојба, како резултат на „конзистентната политика на дебугаризација во минатото на територијата на денешна Република Северна Македонија“.
Слични обвинувања денеска стигнаа и од претседателот Румен Радев.
„Ова допрва треба да се утврди, но тоа е систематски процес на дебугаризација, процес на уништување на нашето културно-историско наследство во Северна Македонија. Ова прашање го поставив на Самитот во Љубљана. Предворјето за интеграција на Северна Македонија во ЕУ се правата на Бугарите, недискриминација, како и нивна целосна интеграција во културниот, економскиот, социјалниот и политичкиот живот на оваа земја. Исклучително е важно да бидат признаени во Уставот на С Македонија, и тоа свечено да биде прогласено од претседателот, Владата и Собранието на С Македонија“,
изјави Радев.
За сквернавење на бугарски гробишта, Софија реагираше и на почетокот на месецов кога испрати протестна нота до земјава поради менување на надгробната плоча на војводата Велко Скочивирчето и осум негови соборци од 1904 година, која се наоѓа во прилепското село Клепач. Бугарското МНР реагираш зошто била промената плочата и првичното бугарско писмо било заменето со македонско.
Но, и тогаш МНР ги отфрли обвинувањата и посочи дека член на семејството на војводата Велко Скочивирчето, во договор со црковниот одбор на црквата „Архангел Михаил“ во Клепач, на своја иницијатива и ангажман, ја извршил замената на надгробната плоча, при што самоволно одлучил да ја смени содржината и јазикот. И овој споменик за кој реагираше Бугарија нема ниту еден статус на заштитено културно обележје или природна реткост, туку се работи за приватен гроб и надгробна плоча.