Ние не бевме информирани, ниту постоеја индикации за какви било закани или можен напад врз делегацијата на ОБСЕ, ниту кон претседавачот Османи за време на неговата посета во молдавскиот регион Транснистрија, велат од МНР
Министерството за надворешни работи (МНР) нема информации за обид за атентат на шефот на дипломатијата Бујар Османи за време на неговата посета на Молдавија, каде што беше во улога на претседавач со ОБСЕ, организација со која 2023 година претседава Северна Македонија.
Изјавата од МНР доаѓа откако таква информација се појави во дел од тамошните медиуми.
„Реализираните посети на Украина, Молдавија, како и предвидените теренски посети во другите таканаречени „загрозени подрачја“ се реализираат со јасна назнака дека се тоа посети на делегацијата на ОБСЕ, што во меѓународните односи се сметаат за посети со зголемен ризик и внимателност. Претседавачот имаше целосна доверба во безбедносните служби на Молдавија и во тамошните власти, кои ја гарантираа неговата безбедност и безбедноста на делегацијата. Ние не бевме информирани, ниту постоеја индикации за какви било закани или можен напад врз делегацијата на ОБСЕ, ниту кон претседавачот Османи за време на неговата посета. Безбедноста на претставниците на ОБСЕ е од висок приоритет и Организацијата ќе ја продолжи блиската соработка со локалните власти за време на која било посета и на која било локација“,
велат од МНР.
Инаку, како што појаснуваат, сите посети на делегација на ОБСЕ и на претседавачот, во случајот Османи, предвидуваат посебни безбедносни протоколи и за нив е надлежна земјата-домаќин.
По преземањето на претседателството, Османи најави дека меѓу првите негови посети ќе биде Украина во јануари годинава, а во февруари ја посети и Молдавија.
За време на посетата, тој беше и го регионот Транснистрија – автономна територија која не е под контрола на молдавските власти и во која живеат Руси, Украинци и Молдавци. Првичната информација за можен напад произлезе од проруските структури во овој регион, но тоа беше демантирано од официјалните власти во Молдавија.