Украина ја повика меѓународната заедница веднаш да дејствува и истакнува дека само обединети и решителни чекори можат да ја запрат агресијата на Владимир Путин против Украина
Ова е чин на војна, напад на суверенитетот и територијалниот интегритет на Украина, грубо кршење на Повелбата на ООН и основните норми и принципи на меѓународното право, соопшти украинското Министерство за надворешни работи по рускиот напад врз цели во земјата.
„Претседателот на Руската Федерација Владимир Путин најави почеток на нов бран на агресија против Украина. Целта на руската офанзивна воена операција е уништување на украинската држава, насилно заземање на украинска територија и воспоставување окупациска контрола. Руските војски остваруваат напади на мирните украински градови од различни правци, вклучително и од страната на привремено окупираните Донбас и Крим, како и североисточниот регион. Украина го активира своето право на самоодбрана во согласност со меѓународното право“,
се вели во изјавата што ја пренесе и Амбасадата на Украина во земјава.
Украина ја повикa меѓународната заедница веднаш да дејствува и истакнува дека само обединети и решителни чекори можат да ја запрат агресијата на Владимир Путин против Украина.
„Нашите партнери мора веднаш да активираат пакет на нови санкции. Исто така, ги повикуваме и пријателските престолнини да продолжат да ги зајакнуваат одбранбените способности на нашата држава преку обезбедување оружје и воена опрема. Од нашиот заеднички одговор сега не зависат само животите и безбедноста на украинските граѓани, туку и безбедноста на граѓаните на Европа и иднината на светскиот поредок“,
се додава во изјавата.