На ракометниот натпревар од СЕХА-лигата меѓу Партизан и Вардар во Белград пред два дена, навивачите на Партизан, гробари, истакнаа транспарент со навредлива содржина за македонските навивачи и за Македонците
Министерството за надворешни работи вчера стапило во контакт со колегите од Министерството за надворешни работи на Република Србија, при што упатило реакција со осуда за провокативните навреди и пароли демонстрирани за време на натпреварот меѓу РК Партизан и РК Вардар во Белград од страна на навивачката група на РК Партизан.
„Со овие непријатни активности, освен што беа погазени принципите за фер и спортско однесување, беа длабоко повредени достоинството на Република Северна Македонија и нејзините граѓани. Министерството укажа дека ваквите реакции од групи поединци воопшто не се во духот на одличните билатерални односи кои ги негуваат двете земји“,
соопштија од МНР.
Оттаму додаваат дека српската страна, преку својата амбасадорка во Северна Македонија, изразила жалење и се оградила од овие изолирани случаи на поединци кои на никаков начин не ги отсликуваат позициите на официјален Белград во однос на нашата земја, ниту, пак, се во духот на заемните заложби за јакнење на севкупните билатерални односи меѓу двете земји.
На ракометниот натпревар од СЕХА-лигата меѓу Партизан и Вардар во Белград пред два дена, навивачите на Партизан, гробари, истакнаа транспарент со навредлива содржина за македонските навивачи и за Македонците. Тие во првото полувреме истакнаа грчко знаме, а потоа, во второто полувреме истакнаа парола со зборовите:
„Група со српско име, бугарски војник слави, мора да е тешко со таа криза на идентитет во главата“.
За време на натпреварот гробарите скандираа: „Јужна Србија, никогаш Македонија“.