На конкурс за вработување за шест лекари, еден од кандидатите бил треторангиран, а друг шести, но тврдат дека раководството наместо нив ги вработило кандидати кои имале помалку поени од нив односно биле на седмото и осмото место на ранг-листата
Двајца млади лекари, Стојан Лазаров и Андреј Коцев, денеска упатија обвинувања за нерегуларности и пристрасност од страна на раководството на Општата болница со проширена дејност од Кочани во постапка за вработување.
Тие, како што тврдат, уредно се пријавиле на конкурсот за вработување на шест лекари, но иако се нашле повисоко на ранг-листата, биле одбиени. Наместо нив, примени се кандидати кои имале помалку поени, биле со понизок просек и се нашле на седмото и осмото место на листата.
„Уредно поднесов документација, а од страна на Комисијата за селекција бев соодветно оценет со поени од стручниот испит и од познавање на англискиот јазик. Се најдов на трето место на ранг-листата, а мојот колега Коцев беше шести. Директорот на болницата, спротивно од предложената листа, нè тргна нас, а прими лица кои имаат двоцифрено помалку поени. Штом е донесена таква одлука, се прашуваме која е потребата од просек во оценките, полагање испит и зошто постои Комисијата?“,
истакна Стојан Лазаров, јави дописникот на МИА.
Двајцата кочански лекари побараа средба со министерот за здравство, Беким Сали, за да го запознаат со случајот и да помогне во неговото расчистување.
„Ја повикуваме и Државната комисијата за одлучување во управна постапка и постапка од работен однос од втор степен да го разгледа случајот. Исто така, во текот на идната недела ќе поднесеме соодветна пријава против директорот на болницата, за злоупотреба на службената должност“,
истакна Андреј Коцев.
Директорот на Општата болница со проширена дејност, Александар Серафимов, наведува МИА, не беше достапен за одговор во врска со случајот.