Сакам да истакнам дека во просторијата и во присуство на сите лидери на НАТО, тој не ја следеше таа пракса и го користеше уставното име на својата земја – изјави грчкиот премиер во Вашингтон
„Гласот на Америка” јави дека Мицкоски неколкупати кажал Северна Македонија на дебатата во Школата за меѓународни односи на Универзитетот „Џонс Хопкинс“ во Вашингтон, иако тие сегменти ги немаше во видеозаписот што Владата го сподели со медиумите во земјава
Македонскиот премиер Христијан Мицкоски на официјалните состаноци на сите лидери на НАТО-самитот го користеше уставното име на државата Република Северна Македонија. Ова го изјави грчкиот премиер Киријакос Мицотакис на прес-конференција која тој ја одржа пред крајот на самитот со новинарите од грчките медиуми присутни во Вашингтон.
Сепак, како што посочи Мицотакис пред новинарите, тој ги информирал колегите од НАТО дека е загрижен оти Мицкоски одлучил да не го спроведува клучниот дел од Договорот од Преспа во врска со употребата на името ерга омнес, што значи внатре и надвор од државата, односно да ја нарекува државата Република Македонија дома што, како што вели грчкиот премиер, е забрането со договорот.
„Секако, сакам да истакнам дека во просторијата и во присуство на сите лидери на НАТО, тој не ја следеше таа пракса и го користеше уставното име на својата земја“,
рече Мицотакис.
На новинарско прашање од грчките медиуми во врска со тоа што Мицкоски изминатите три дена во Вашингтон во своите изјави и видеообраќања објавени на социјалните мрежи, државата ја нарекува Македонија, и дали грчката влада размислува да го искористи членот 19 од Договорот од Преспа, со кој се предвидува да се покрене конкретна постапка во случај да се констатираат прекшувања, Мицотакис рече дека засега нема да го открие оружјето со кое би одговорил на тактиката на раководството на соседната земја.
„Вака или онака тие ќе сфатат дека оваа тактика е целосно контрапродуктивна“,
изјави грчкиот премиер.
Според него, договорите мора да се почитуваат, а тоа го соопштил и на самитот на НАТО, за што рече дека смета оти го разбираат и сојузниците.
„Сакаме Северна Македонија да преземе чекори кон европски пристап. Секако, тоа претпоставува почитување на меѓународното право и почитување на договорите што земјата ги има потпишано“,
вели тој.
Инаку, пред неколку дена, во изјава на маргините на самитот, Мицотакис рече дека целосно спроведување на Договорот од Преспа е од суштинско значење за Алијансата, за Западен Балкан и за меѓународната заедница откако претходно претседателот на САД, Џо Бајден, посочи за важноста на Западен Балкан за безбедноста на Алијансата.
Премиерот Мицкоски изминатите три дена додека присуствуваше на НАТО-самитот во неговите јавни обраќања ја нарекуваше државата Македонија. „Гласот на Америка” јави дека уставното име на државата Мицкоски го кажал неколкупати на дебатата на Школата за меѓународните односи на Универзитетот „Џонс Хопкинс“ во Вашингтон, иако тие сегменти ги немаше во видеозаписот што Владата го сподели со медиумите во земјава.