Замрзнувањето на цените на основните прехранбени продукти можеби ќе го ублажи, но никако не може да го запре бранот на зголемена инфлација и намален стандард на граѓаните, тоа не се прави со ограничување на цената на производите, туку тоа е една од сетот мерки коишто требаше да се преземат, смета претседателот на опозициската ВМРО-ДПМНЕ, Христијан Мицкоски.
Одговарајќи на новинарското прашање додаде дека ВМРО-ДПМНЕ уште во април и мај нагласувала дека Македонија ќе дојде до оваа ситуација во која е денес поради не преземање соодветни мерки од власта.
„Инфлацијата е увозна, но е и домашна инфлација. Нивните политики се погрешни. Наместо да копаат јаглен и да произведуваат струја, тие се организираа картелски и пљачкаа, а тоа го прават и денес. Ќе видите од овие 4 милијарди денари, ќе видите дека 14,5 милиони евра наместо да одат за струја, отидоа за плаќање на фактурите за добавувачите во РЕК Битола и повторно заврши некое куферче таму во југоисточна Македонија“,
рече Мицкоски.
Тој укажа дека од власта не треба ништо да се очекува, ниту дека нешто воопшто ќе сменат кон подобро. „За жал на крајот од денот два пати ја плаќаат сметката, еднаш кога крадат и еднаш кога се неспособни да произведат“, рече тој.
„Народот е најважен, тој е суверен во Македонија, а ние политичарите сме менливи и минливи. Прашањето е што ќе оставите позади вас. Власта ќе остави девастирана состојба во државата односно комплетно разурнат трул систем којшто не функционира, којшто се плаќа со човечки животи, со уништен стандард и сето тоа го прават заради лично богатење и личен интерес“,
заклучи Мицкоски.