Тој рече и дека земјава била пофалена за Планот за раст оти најквалитетно било завршено нашето досие и дека доколку се оди по планот очекува првата транша да ја добиеме до крајот на годината
Приоритет и фокус на Полска, која од 1 јануари го презема претседавањето со ЕУ, останува Балканот. Ова било уверувањето што премиерот Христијан Мицкоски го добил од неговиот полски колега Доналд Туск на средбата што ја имале за време на Самитот ЕУ-Западен Балкан што овие два дена се одржа во Брисел.
„Искрен и пријателски разговор имав со Туск. Ја отворивме темата која што некако лебдеше меѓу нас дека Полска повеќе ќе биде ориентирана во делот на интересите кон Украина и други земји од тој дел, отколку кон Балканот. На ова од неговата страна добив силно уверување дека тоа не е точно и дека негов приоритет и фокус останува Балканот“,
рече Мицкоски во денешното интервју за МТВ.
Според него, после унгарското претседателство за земјата ќе има „еден континуитет на добра волја и желба“.
Тој додаде дека на средбата со Туск се согласиле дека мора да има опипливи резултати што сите ќе може да ги почувствуваат.
Мицкоски вели дека во работниот дел и на работната вечера меѓу лидерите имало отворена дискусија и дебати на кои биле кажани многу работи, а имало и споредби со минатото.
„Она кое што е важно да се напомене, што впрочем го кажа еден од премиерите на земјите членки, е дека според него, тој присуствувал на многу од овие самити, овој бил самит на којшто најотворено најдиректно и најискрено се кажани работите и од лидерите на Западен Балкан, но и од лидерите на земјите членки на ЕУ и такво беше и моето чувство“,
вели Мицкоски во интервјуто.
Тој го пренесе кажувањето на, како што рече влијателен премиер на држава, кој рекол дека и во 2004 година кога имало голем бран на проширување на ЕУ, може да се каже дека ниту една од тие земји коишто станаа членки, не ги исполнуваа критериумите согласно поглавјата, согласно кластерите. Но, премиерот, како што рече Мицкоски, предочил дека постоела храбра политичка одлука пакетот да се затвори, односно сите тие земји да станат членки на ЕУ.
„Па така и сега очекувам дека ќе се создадат услови за една храбра одлука од страна на ЕУ да можат сите земји од Западен Балкан наеднаш да бидат примени во рамките на ЕУ“,
рече Мицкоски.
Тој додаде дека тоа што е многу важно за нас како држава е што во ЕУ почнува да се слуша поинакво мислење од она понизно и вовлекувачко на владите во изминатите седум години.
„Она кое што за нас е многу важно е дека напредувањето ќе биде по заслуги. Потенцирано е и во резолуцијата и во заклучоците. Реално се соочуваме со проблемите и ги кажуваме оние наши стравувања и грижи кои се, се бара план. Тоа е она коешто мене ме прави задоволен“,
додава Мицкоски.
Тој рече и дека земјава била пофалена за Планот за раст оти најквалитетно било завршено нашето досие и дека доколку се оди по планот очекува првата транша да ја добиеме до крајот на годината.
„Се чека сега одговор од Брисел на конечната верзија на законот којшто треба да помине во Парламентот и доколку ја добиеме таа верзија час поскоро, а јас ги замолив нашите колеги коишто доаѓаат од нашето семејство Европската народна партија да ургираат во комисијата да се забрза тој процес. Веднаш штом го добиеме тој одговор и веднаш штом се ажурира конечната верзија на договорот, ние ќе го поминеме низ процедурите во нашиот Парламент и очекувам до крајот на оваа година да ја добиеме и првата транша или еве да речеме најдоцна во првата половина од јануари следната година. Но, оптимист сум дека тоа ќе се случи оваа година“,
рече премиерот.
Во интервјуто Мицкоски говореше и во однос на проблемот со Бугарија каде истакна дека неговата дискусија на Самитот „се водела од тоа дека потребно е решение кое ќе гарантира да го изодиме патот до крај, но преговори за идентитетски прашања не доаѓаат во предвид, додека договорите со соседите треба да се читаат такви какви што се бидејќи во двата ни ветуваат безусловна поддршка на патот кон ЕУ“.
Според него, секој процес што е поврзан со емоцијата тогаш не може да биде процес кој ќе се темели на напредок, квалитет на испорака, резултати.
Тој додаде дека билатерална соработка за идентитетски прашања не доаѓа во предвид, затоа што тука има емоција, нема рационално.
„Никому не оспоруваме ништо и не сакаме нас да не оспоруваат, тоа е мојата порака и вчера и денеска. Било кој ќе отвори тема на овие прашања, тогаш тој не му мисли добро ниту на соседот, а уште помалку ги почитува европските вредности коишто велат обединети во различностите“,
изјави премиерот.
За време на престојот во Брисел, Мицкоски имаше повеќе билатерални средби, меѓу кои и со заменик-претседателката на Европската комисија и висока претставничка за надворешна и безбедносна политика на ЕУ, Каја Калас.