Во однос на случувањата на светската политичка сцена, претседателот на ВМРО-ДПМНЕ истакнува дека Македонија, како ниту Србија, ниту Албанија, не е одлучувачка сила во овие процеси
Копенхашките критериуми треба да го одредат натамошниот развој на европската интеграција на Западен Балкан и на Македонија. Европската интеграција на која било земја не треба да биде условена со субјективни политички критериуми, туку исклучиво да зависи од општи и објективни критериуми кои важеле за сите, вели лидерот на ВМРО-ДПМНЕ, Христијан Мицкоски, за Политика.рс.
„Непринципиелноста раѓа неправда, а неправдата раѓа фрустрација и апатија кај граѓаните. Земјите од Западен Балкан имаат сериозен предизвик пред себе да ги достигнат копенхашките критериуми, иако сум убеден дека тие се многу поподготвени во оваа фаза отколку другите земји кога се приклучија на ЕУ во минатото. Имаме сериозен предизвик: да се справиме со борбата против организираниот криминал, владеењето на правото, економските и социјалните прашања кои ќе нè доближат до европските вредности. Тоа беше нашата домашна задача на која требаше да ги насочиме нашите капацитети и енергија“,
вели Мицкоски.
На прашањето зошто не се согласува со уставни измени со цел внесување на Бугарите во Уставот и зошто бара предвремени избори, лидерот на ВМРО-ДПМНЕ посочува дека во Македонија на последните избори никој не добил мандат за промена на Уставот.
„Верувам во теоријата на мандатот, што значи дека една партија оди на избори со програма и ветувања кон своите гласачи, за што ќе работи во наредниот период. Во Македонија на последните избори никој не доби мандат за промена на Уставот – ниту една партија не го претстави ова во својата програма. Затоа сметам дека предвремените избори се единствениот начин граѓаните да кажат што мислат и како мислат дека Македонија треба да се движи во наредниот период. Би додал дека според последното истражување на јавното мислење, околу 60 отсто од луѓето не се задоволни од работата на владата и нејзините политики. Не се задоволни од економијата, владеењето на правото и исполнувањето на европските критериуми. Ова е дотолку повеќе што треба да имаме избори за одлучување за нова влада, која ќе добие мандат од граѓаните да решава проблеми и предизвици. Во спротивно, Македонија губи време. Доколку не се одржат изборите, ние како држава нема да видиме ништо поразлично од она што го гледаме последните пет-шест години додека оваа влада на СДСМ ја води државата. Затоа треба да имаме избори, нов мандат, нова влада и јасна насока на државата кон посигурна иднина“,
вели Мицкоски.
Во однос на случувањата на светската политичка сцена, претседателот на ВМРО-ДПМНЕ истакнува дека Македонија, како ниту Србија, ниту Албанија, не е одлучувачка сила во овие процеси.
„Тие мора да бидат многу внимателни и да ги застапуваат нивните интереси кои се стратегиски релевантни за овој регион. На тој фронт ништо не зависи од нас, но секако е важно да се поддржат стратегиските процеси кои би обезбедиле мир. Единствената шанса што им се нуди на Македонија, Србија и Албанија во оваа криза е да покажеме дека ги научивме лекциите од минатото и да градиме подобра заедничка иднина“,
вели Мицкоски во интервјуто за „Политика“.
Во однос на претседавањето на Македонија со ОБСЕ, Мицкоски изрази очекување дека Македонија и сите земји членки на ОБСЕ ќе работат да запре војната во Украина. Според него, недозволиво и незамисливо е да се води војна во 21 век, да се крши суверенитетот на една земја и да се оспорува нејзиниот интегритет.