Немам намера да си поднесам оставка за да му помогнам на СДСМ и Зоран Заев.
Вака лидерот на ВМРО-ДПМНЕ Христијан Мицкоски уште еднаш им одговори на дел од членството кое изминативе денови бара негова оставка и свикување вонреден партиски конгрес за негова смена.
Голем дел од денешната прес-конференција на Мицкоски, која започна со квалификции за новата Влада, беше посветен токму на внатрепартиските превирања, при што лидерот на опозицијата, иницијаторите за негова смена ги нарече криминалци, одработувачи за СДСМ и Зоран Заев, мафија, мрачни сили, печалбари во политиката, хотелски коалиции, појаничарени слуги…
„И додека сум жив, и ако не сум, има план Б и В, ќе се борам против оние кои му служат само нему, на Зоран Заев за да си го зашттат својот криминал… За сите оние кои прават криминал, кои одработуваат за милост и кои поради тој криминал потклекнале и се во скутот на Зоран Заев, треба да знаат сега и во иднина – нема да правам компромиси со криминалци, нема да дозволам да се прогледа низ прсти поради сите нивни грешки и нема да премолчиме богатење на грбот на народот. Сите кои станаа најдобри другари на Зоран Заев не се затоа што се силни туку дека се екстремно слаби“,
рече Мицкоски.
Тој не ги именуваше, но рече дека тоа се луѓе кои се сега гласни, а изминатите 32 месеци биле тивки и ровареле внатре во партијата, работеле на поделба на членовите за, како што рече, ова ВМРО-ДПМНЕ да не успее. На некои од нив алудираше, поврзувајќи ги со познатите случаи за криминал на претходната власт за кои се уште нема завршница.
„Сигурно сте се запрашале зошто нема завршница за познатите случи за кои Зоран Заев велеше дека се криминал. Одговорот на тоа се добива овие денови кога гледаме како неколкумина појаничарени слуги одработуваат, надевајќи се на негова милост и своја слобода. Тоа се печалбари во политиката и хотелски коалиции, кои се товар на ВМРО-ДПМНЕ кој мора да отпадне. Тоа е пакт на политиката и мафијата. Тој политички брак на власта и дел од тоа политичко подземје кое се нуди за опозиција на опозицијата за да ја спаси власта која направи милиони за себе со чиновничка плата, ќе биде поразен. Или тие или Македонија“,
рече Мицкоски.
Конкретно за барањата за вонреден конгрес, тој тврди дека такво нешто не е поднесено до архивата на партијата. Тврди, исто така, и дека ги повикал тие што деновиве држеле прес-конференции пред штабот да дојдат кај него на разговор за, како што рече, да се разјасни како се свикува вонреден конгрес.
Бидејќи таква средба не се случила, тој на денешната прес-конференција потсети каква е процедурата според партискиот статут за свикување вонреден конгрес:
„Според статутот, има два начина: Јас како претседател да побарам од ЦК свикување и вториот е, 50 проценти од членовите на ЦК да поднесат барање да се расправа за свикување вонреден конгрес. И во двата случаи, во рок од пет дена од тие барања се свикува ЦК и во рок од 15 дена ЦК расправа за евентуално одржување на вонреден конгрес. Две третини од членовите на ЦК носат одлука дали ќе се свика. Сето останато е спротивно на Законот за политички партии и статутот на партијата“,
објасни Мицкоски.