Одговарајќи на едно од прашањата, лидерот на ВМРО-ДПМНЕ се пожали дека му недостасуваат семејството и пријателите, на кои, како што рече, ќе им посвети повеќе време кога ќе ја сруши „оваа корумпирана власт“
Нов пристап за комуникација со граѓаните испроба вечерва лидерот на ВМРО-ДПМНЕ Христијан Мицкоски, преку сесија во живо на фејсбук, каде што одговараше на повеќе прашања.
Одговарајќи на едно од прашањата, Мицкоски се пожали дека во изминатиот период немал многу време за семејството и за пријателите, затоа што, како што рече, се посветил на партијата и на политиката.
Сите ми недостасуваат, ама ветувам дека ќе им посветам повеќе време откако ќе ја поразам оваа корумпирана влада“,
рече Мицкоски , посочувајќи дека, во слободно време спортува и оди во вежбалница, што, како што нагласи, беше злоупотребено од страна на власта во почетокот на епидемијата.
На прашање што предлага во делот на пандемијата, затоа што ВМРО-ДПМНЕ сега го имала најдобриот инфектолог во Македонија и пошироко (Вело Марковски н.з.), Мицкоски рече дека власта „мува не ја лази затоа што сме рекордери според бројот на заразени во Европа”.
„Она што најмногу мене ме загрижува како човек, универзитетски професор и политичар, е тоа што мува не ги лази за тоа што го прават. Нема никаква одговорност поради сите лоши проценки, поради дебаклот на отворена сцена кој се случува. Ако малку слушаа од тоа што ВМРО-ДПМНЕ го предлагаше, ние денеска немаше да се наоѓаме во една ваква ситуација“,
одговори, меѓу другото, Мицкоски.
Тој рече и дека ВМРО-ДПМНЕ е за локални избори со еден изборен круг, со цел да се заштедат пари во време на пандемија.
„На тој начин, можеме да ги заштедиме тие средства кои ќе се потрошат за вториот изборен круг за градоначалници за купување компјутери, за нашите деца да можат да се стекнат со пристојно образование. Апсолутно ВМРО-ДПМНЕ е во насока на поддршка на идејата за еден изборен круг на следните локални избори за избор на градоначалници и апсолутно се сложуваме за преференцијални листи на советници на следните локални избори‘‘,
нагласи Мицкоски.