На ВМРО ѝ пречи ДУИ и нејзиниот проевропски и проамерикански став, реагираат од партијата додавајќи дека Мицкоски е во отворен натпревар за екстремистички гласови со антиалбанската Левица
Христијан Мицкоски со антиалбанска реторика стреми да го запре падот на рејтингот, реагираат од Демократската унија за интеграција (ДУИ) за денешните изјави на лидерот на ВМРО-ДПМНЕ.
ДУИ оценува дека Мицкоски сака слабеење на политичкото претставување и дефакторизирање на Албанците во земјата
„Во 2022 година, сè уште имаме политички лидери во земјата кои продолжуваат да демонстрираат непочитување кон изразената волја на албанските граѓани за нивно политичко претставување со цел очајно да освојат некои екстремистички гласови во сенка на нивната опаѓачка популарност. Денешната изјава е демонстрација на тенденцијата на Мицкоски дека ги сака немоќните, безгласните, нефакторизирани Албанци, во негова служба и на нивните моноетнички, антиевропски и антиамерикански агенди. На ВМРО ѝ пречи ДУИ и нејзиниот проевропски и проамерикански став“,
велат од ДУИ.
Од владејачката партија порачуваат дека заедно со граѓаните нема да дозволат државата да се дезориентира од европскиот пат и да се реализира деструктивната тенденција за Мицкоски кој, велат, е во отворен натпревар со антиалбанската Левица за екстремистички гласови.
Во денешната изјава Мицкоски рече дека премиерот Димитар Ковачевски не е човекот кој одлучува туку дека тоа го прават ДУИ и Али Ахмети и рече дека работат на нивно дефакторизирање. Изјавата тој ја даде коментирајќи ја вчерашната изјава на премиерот дека ќе нема предвремени парламентарни избори.
„Го слушав вчера Ковачевски, Ковачевски не е човекот којшто одлучува, таму одлучуваат два фактори, таму одлучува ДУИ и ДУИ е свесен и Али Ахмети дека тој никогаш нема да биде во подобра позиција од оваа сега, најсреќен во оваа позиција е ДУИ и Али Ахмети. И вториот фактор се парите што се делат од тендерите во четири очи, таму нема стратегија, нема политичка мудрост нема визија, таму фактор е ДУИ и парите што се делат, но за среќа работиме на тоа да ги дефакторизираме овие два фактори, едниот е ДУИ и Али Ахмети а другиот е парите што се крадат, затоа што новата влада на ВМРО-ДПМНЕ има сериозна намера да се зафати со пресметка на криминалците во политиката, а тие во оваа влада ги има многу“,
рече Мицкоски.