Одржување на предвремени парламентарни избори не е во трите актуелни приоритети на ВМРО-ДПМНЕ, изјави денеска лидерот на опозициската партијата, Христијан Мицкоски, одговарајќи на новинарско прашање на прес-конференција.
Тој само го повтори досега кажаниот став и од други високи претставници на партијата дека поради пандемијата не треба да се одржат избори во скоро време, односно на крајот на јуни или почетокот на јули, како што се шпекулира во јавноста.
„ВМРО-ДПМНЕ е подготвена да го порази СДСМ секогаш и на сите граѓани им е јасно, кога и да се случат изборите. Но, исто така, познат е и ставот на партијата дека одржување на предвремени парламентарни избори во услови на пандемија на ковид-19, во услови кога ги броиме заразените и оние кои, за жал, го губат животот, во услови на економска, санитарна и образовна криза и фактот дека имаме кризна состојба, еден од трите приоритети на ВМРО-ДПМНЕ не е одржување на парламентарните избори. Најпрво, да се избориме за здравјето на луѓето, да ја вратиме економијата на победничка патека, па потоа може да размислуваме за избори“,
рече Мицкоски.
Исто така, ВМРО-ДПМНЕ смета дека е неуставно Собранието повторно да се состане откако веќе беше распуштено.
„Овој состав на парламентот е поранешен и мандатот на пратениците со моментот на распуштањето е завршен. Тие го вратија легитимитетот кај граѓаните и единствен кој може да ја наполни таа сала со пратеници е народот. И не може Заев и група поранешни пратеници да го кршат Уставот“,
изјави Мицкоски.
*Поврзани вести
Џафери не го менува ставот: Собранието може да се врати само по следните избори
СДСМ: Рано е и за избори и за лидерска средба кај Пендаровски
Милошоски смета дека Собранието не може да заседава, Груби бара изјаснување од Уставен суд