„Жалам кога политички аналфабети се дрзнуваат да даваат такви коментари бидејќи рокот не е 1 јуни, туку 30 јуни. Тоа е елементарно непознавање, но тоа е што е“, изјави премиерот откако лидерот на СДСМ, Венко Филипче, обвини дека денеска истекува рокот за исполнување на точките од Реформската агенда, а дека од 10 клучни закони донесени се само два
Ја слушам опозицијата како вели дека дека рокот за спроведување на реформите истекол. Жалам кога политички аналфабети се дрзнуваат да даваат такви коментари бидејќи рокот не е 1 јуни, туку 30 јуни. Тоа е елементарно непознавање, но тоа е што е – изјави денеска премиерот Христијан Мицкоски откако лидерот на опозицискиот СДСМ, Венко Филипче, обвини дека денеска истекува рокот за исполнување на точките од Реформската агенда, а дека од 10 клучни закони досега се донесени само два.
Мицкоски информира дека денеска имал состанок со колегите од Владата и од институциите во врска со Реформската агенда и во однос на чекорите што треба да се преземат до крајот на јуни.
„Од тоа што денеска го разговаравме, голем оптимист сум дека и оние реформи што се во грејс период, но и оние чијшто рок за испорака завршува некаде крајот на јуни, најмалку 90 проценти ќе бидат ќе бидат испорачани“,
рече Мицкоски одговарајќи на новинарски прашања по отворањето на Форумот МЕФ 2026.
Премиерот рече дека заклучно со декемврискиот извештај, земјава е водечка земја во регионот по испорака на реформите и дека согласно тоа користи најголем дел од средствата како резултат на испорачаните чекори.
„Во четврток имаме повторно координација со Брисел со господинот Герт Јан Копман, така што очекувам местото на вистински фронтранери кога станува збор за испорака на реформите да го задржиме и во јунскиот извештај. Во таа смисла навистина можам да кажам дека во овој момент се движиме најдобро од сите земји во регионот“,
додава премиерот.
Во пресрет на средбата со претседателот на Европскиот совет, Антонио Кошта, кој утре ќе ја посети земјава во рамки на неговата турнеја низ земјите од Западен Балкан, Мицкоски вели дека пораките се јасни и аргументирани.
„Ние сме подготвени да разговараме со секого на која било тема и да бараме решенија. Тука не треба никој да има дилема, но тие решенија мора да бидат достоинствени и да опфатат заштита на македонскиот национален идентитет, но истовремено решенија кои ќе значат почеток и крај на процесот, а не само почеток на процесот“,
рече премиерот.