Лидерот на ВМРО-ДПМНЕ порача дека следните неколку дека се многу значајни и апелираше до Владата во прв план да ги стави стратешките и националните интереси, а ако постигне договор со кој би се самонегирале како нација, пак, порача дека ќе се случи народ
Очекувам да се случи првата меѓувладина конференција во декември, тоа Европа ѝ го должи на македонските граѓани и очекувам да бидат со резигнираност отфрлени овие максималистички, крајно негаторски и неевропски позиции на нашиот сосед, изјави денеска лидерот на ВМРО-ДПМНЕ Христијан Мицкоски во врска со отпочнувањето на преговорите со ЕУ и најавуваната блокада од Бугарија.
Тој денеска на прес-конференција ѝ порача на владата да ги стави националните и стратешките интереси во прв план, но и порача дека мора некогаш да се каже „доста е“.
„Ние како нација и држава не можеме да прифатиме по ниту една цена да се самодречеме по ниту една цена. Мора некогаш да се каже доста е на лазењето по нерви и на навредливата реторика во која ние Македонците ќе се повлекуваме и постојано ќе губиме. Доста е од тоа како држава да даваме се, а да не добиеме барем малку. Не смееме да прифатиме да се самоизбришеме“,
рече Мицкоски.
Лидерот на ВМРО-ДПМНЕ вели дека прв би излегол да честита доколу се постигне договор кој нема да ги негира јазикот, историјата, македонското малцинство во Бугарија …
„Ако владата постигне решение недвосмислено заштитувајќи го нашиот македонски јазик и неговата антропологија и историја, ако постигне решение а да не се откаже од македонското малцинство кај источниот сосед, ако постигне решение во кое ќе ги заштити историјата, имињата и жртвата на дејците кои животот го положија за независна македонска држава, ако постигне решение во кое нема окупаторите да бидат административци, јас ќе бидам првиот што ќе застанам првиот што ќе застане овде и ќе им ја стегнам раката и ќе речам секоја чест“,
изјави Мицкоски.
Во спротивно, пак, порача, на власта ќе ѝ се случи народ.
„Тогаш ви ветувам дека ќе им се случи народ низ цела Македонија. Овие неколку дена се многу значајни во разговорите со нашиот источен сосед, а нам искуството со оваа влада ни вели дека мора да се биде претпазлив. Апелирам владата на Заев како свој прв приоритет да ги постави националните и стратешки интереси и да постигне решение не по цена на самоодрекување и бришење, решение кое ќе биде гарантор на нашиот идентитет, јазик и посебност и виза за непречен почеток на преговорите со ЕУ“,
изјави Мицкоски.
Тој рече дека изминатиот период се воздржувал да кажува јавни ставови за спорот со Бугарија бидејќи ја имал предвид важноста на разговорите и интересот да се почнат преговорите со ЕУ, но сега го обвини премиерот Зоран Заев дека е избор на проблемите.
„Целиот овој проблем со источниот сосед се темели на една лага на Зоран Заев и на неговата основна карактеристика, а тоа е системот на преговори со свиткана кичма. Овој проблем немаше дотолку да ескалира и денес да имаме една непремостлива препрека, ако не беше Зоран Заев и неговата лага дека работата со датумот е завршена. Дополнително, дека нашиот источен сосед ќе добие нешто што тој неформално го има ветено, решение за јазикот и историја по терк на нашиот источен сосед“,
обвини Мицкоски раскажувајќи дека на средба со висок претставник на бугарската влада му било кажано дека тие „не бараат ништо повеќе од тоа што Заев им го ветил пред изборите 2016“.