Лидерот на ВМРО-ДПМНЕ, Христијан Мицкоски, не потврди дали 5 јули е на маса како можен датум за избори, но рече дека има разговори меѓу политичките партии и нагласи дека нивниот став е јасен.
„Нашите позиции поврзани со предвремените парламентарни избори македонската јавност ги знае, исто така и нашата позиција дека компромис треба да се постигне за интересот на граѓаните и државата, но не по цена на здравјето на граѓаните. Канал на комуникација постои. Јас не би сакал да изнесувам дополнителни коментира во врска со каналот за комуникација кој постои бидејќи, како што реков, не сме сите исти и не се занимаваме сите во ваков тип на брифинзи. Доколку има договор и кога ќе има договор ние ќе и го соопштиме на јавноста“,
рече Мицкоски одговарајќи на прашање дали Зоран Заев го понудил 5 јули како датум за избори и дали ќе бара нова лидерска средба пред истекот на вонредната состојба на 30 мај.
Датумот, порача лидерот на ВМРО-ДПМНЕ, треба да се донесе со консензус и тие не бегаат од тој принцип.
„Исто така, стоиме на принципот дека секоја вонредна состојба е потребно да се носи во консултација со политичките партии иако за време на втората вонредна состојба тој принцип беше напуштен од страна на Владата и претседателот Пендаровски. За втората состојба имавме спротивен став бидејќи ако зборуваме за состојба каде сме ја победиле пандемијата и сме лидери во регионот тогаш не ја гледавме причината за прогласување на трета вонредна состојба, но очигледно причината беше јасна. Тоа беше да се донесе нова уредба која треба да му послужи на Зоран Заев да се обиде да ги поткупи граѓаните и нивната поддршка за следните парламентарни избори“,
обвини лидерот на опозициската партија.
Мицкоски, одговарајќи на прашања од новинари, уште еднаш го повтори ставот за предлогот на СДСМ избори да има на 21 јуни и порача дека ако власта се одлучи за тој датум „нека ѝ е со среќа изборниот процес“.