На средбата со г.г. Стефан, како што е наведено во фејсбук-објавата на опозицискиот лидер Христијан Мицкоски, тој им честитал за храброста и мудроста на Синодот и поглаварот во дејствувањето на нашата црква до патот на нејзината автокефалност, како чувар на нашите идентитет и култура
Претседателот на опозициската ВМРО-ДПМНЕ, Христијан Мицкоски, денеска на Фејсбук објави оти, во придружба на пратеникот Владо Мисајловски од пратеничката група на партијата, денеска остварил средба со поглаварот на Македонската православна црква – Охридска архиепископија, г.г. Стефан.
На средбата, како што е наведено во објавата, лидерот на ВМРО-ДПМНЕ им честитал за храброста и мудроста на Синодот и поглаварот во дејствувањето на нашата црква до патот на нејзината автокефалност, како чувар на нашите идентитет и култура.
„Македонската црква која овозможува духовно обединување на нашиот народ е значаен столб во нашето суштествување како народ и земја. Да чекориме обединето, мудро и решително“,
се наведува во фејсбук-објавата на опозицискиот лидер.
Пред два дена, на 24 Мај – Денот на сесловенските просветители, српскиот патријарх Порфириј од Соборниот храм „Свети Климент Охридски“ во Скопје објави дека Соборот на Српската православна црква (СПЦ) ја прифаќа и признава автокефалноста на Македонската православна црква – Охридска архиепископија (МПЦ-ОА)