Тој посочи дека „вистинска влада која вистински се грижи за своите граѓани ќе скрати од своите луксузирања од бесрамното трошење и криминалното трошење на народните пари во тендери во четири очи“
Го поддржавме замрзнувањето на цените бидејќи тоа беше еден момент многу тежок за граѓаните со огромно високо ниво на стапка на инфлација. Од денеска се одмрзнуваат претходно замрзнатите цени, што значи дека сега пазарот ќе ја утврдува цената, односно пазарот е тој којшто ќе ја диктира цената. Стравувам за можни последици во делот на инфлацијата и затоа ние како ВМРО-ДПМНЕ и како пратеничка група во парламентот ќе предложиме законски измени во два дела, изјави лидерот на ВМРО-ДПМНЕ, Христијан Мицкоски, од општина Конче.
„Првиот дел е повторно враќање на данокот на додадена вредност за електричната енергија на 5 отсто бидејќи Фатмир Битиќи веќе најавува дека ќе се враќа онаа стапка од 18 отсто. Исто така ќе предложиме намалување на стапката на данокот на додадена вредност за основните прехранбени производи“,
рече Мицкоски.
Тој посочи дека „вистинска влада која вистински се грижи за своите граѓани ќе скрати од своите луксузирања од бесрамното трошење и криминалното трошење на народните пари во тендери во четири очи“.
„И на тој начин ќе помогне да се зачува и онака кревкиот стандард на граѓаните“,
додаде лидерот на ВМРО-ДПМНЕ.
Од денеска престана да важи одлуката на Владата за замрзнување на цената на основните производи. Владата изминатите неколку месеци во пет наврати донесе одлука за замрзнување на цените од кои последната беше од 3 април, а стартуваше два дена подоцна и се однесуваше на одредување на највисоката цена на 11 видови овошја и зеленчуци. Претходно, прво беше замрзната цената на белиот и полубелиот леб на 33 денари. Следуваше замрзнување на цените на млекото и млечните производи, па на оризот и јајцата од кокошка. Пред овошјето и зеленчукот беа замрзнати цените на тоалетната хартија, влажните марамчиња, пелените и хигиенските влошки.
Министерот за економија Крешник Бектеши денеска беше дециден дека доколку одредена компанија или сектор вештачки се обиде да ги зголеми цените на основните прехранбени производи кои беа замрзнати, како дел од мерките на Владата која од денеска престанува да важи, надлежните институции и инспекциски служби веднаш ќе реагираат.