Претседателот на ВМРО-ДПМНЕ, Христијан Мицкоски, во гостувањето во Дневникот на Сител рече дека ќе предложи до Извршниот комитет на партијата да се разгледа можноста за барање за референдум за уставните измени со кои Бугарите треба да бидат внесени во Уставот.
Рече дека граѓаните треба да си го кажат своето мислење, но дека првиот чекор ќе биде собирање на 150.000 потписи.
„Треба да излезат на референдум и да кажат дали се ‘за’ или не се ‘за’ овие измени коишто Владата ги потпиша после овој дипломатски нокаут и капитулација. Но, да излеземе најпрво како партија со став, па тогаш јавноста ќе има повеќе детали. Но, тоа е следната иницијатива којашто планирам да му ја предложам на Извршниот комитет, веднаш по враќањето и повторното функционирање на Собранието. По летните одмори да отпочнеме иницијатива за собирање на 150.000 потписи и да направиме референцумско изјаснување на граѓаните“,
рече Мицкоски.
Прашан дали доколку граѓаните се изјаснат против уставните измени Северна Македонија би можела да се врати назад во процесот, Мицкоски вели дека референдумот би бил задолжителен за политичарите.
„Народот е суверен и политичарите го црпат својот кредибилитет од народот. Народот е тој што е суверен владетел во оваа држава, не ние политичарите. Тоа што сега Бујар Османи потпишал протокол, тоа не значи дека е сѐ завршено. Тоа јас и вчера го кажав на прес-конференцијата, бидејќи преговарачката рамка не е усвоена. Преговарачката рамка ќе се усвои откако ќе се случат уставните измени. Ако народот на референдум каже ‘Нема уставни измени’ – нема. Тогаш ќе бараме друга преговарачка рамка. Тогаш и Европа ќе знае дека народот рекол оти не прифаќа нови уставни измени и ќе мора во преговарачката рамка членот 5 кој се повикува на Договорот за добрососедство и членот 12 од Договорот за добрососедство да биде тргнати од таму, па да разговараме за некои други услови“,
вели Мицкоски.
Според него, народот не треба да очајува и да губи надеж бидејќи процесот сѐ уште не е завршен.
„Потпишал Бујар Османи. Во ред, така одлучил, Албанија требала да почне преговори итн. Но, за Македонија и за македонскиот идентитет не е завршена работата. Не е усвоена преговарачката рамка, а на референдум ако народот каже ‘нема менување на Уставот’, тоа е тоа. На Европа во Брисел ќе им кажеме: ‘Луѓе, народот така одлучи, ве молам, дајте ни друга преговарачка рамка’“,
рече Мицкоски.