Лидерот на ВМРО-ДПМНЕ, Христијан Мицкоски, на „Фејсбук“ реагираше на соопштението од Владата во кое беше објавена негова комуникација на „Телеграм“ со генералниот секретар на Владата, Драги Рашковски, во врска со авионските летови со кои македонски државјани се враќаат во земјава.
Во продолжение во целост ја објавуваме пораката на Мицкоски на „Фејсбук“:
„Добро е што мојата преписка со Рашковски, за наводно хуманитарната акција на владата, излезе во јавноста, бидејќи граѓаните и целата јавност ќе може да ја направат разликата помеѓу луѓе за кои има сведоштва, докази, изјави и сомневања дека прават криминал на грбот на народот и луѓе кои тоа им го кажуваат во очи. Во оваа прилика ќе кажам дека за тоа што Драги Рашковски незаконски објавил приватна преписка и што како човек од Владата не го почитува законот, не треба да стравува затоа што нема да го тужам, но за тоа дека за Владата има основани сомневања дека прави криминал со транспортот на луѓе, има нехуман третман и печали од летовите, е за тоа треба да се плашат, затоа што ќе дојде ден да одговараат за таквото воено профитерство. Доказите со кои располагам ќе ги доставам до институциите веднаш откако ќе се ослободи судството и обвинителството од стегите на власта и принципот “трас-трас” воспоставен од Зоран Заев, а до тогаш јас бурно ќе реагирам за секоја информација од која се гледа дека некој се богати на грбот на измачениот народ. Очигледно криминалците остануваат тоа и во редовна, и во вонредна состојба.“
Портпаролот на опозициската ВМРО-ДПМНЕ, Димче Арсовски, на прес-конференција, рече дека објавувањето на разговорите е обид за амнестија на Владата за целиот сомнеж за криминал кој го прави, проследен со лажни грижи за граѓаните.
„Нема хуманитарна акција каде што граѓаните сами си плаќаат. Незаконското објавување на приватни разговори самото по себе повлекува одговорност пред судовите. Но, еве јавно изјавуваме да не се вознемирува, Мицкоски нема да го тужи Рашковски за изнесените разговори во јавност. Добро е граѓаните да знаат дека ние сме единствените кои сме против сомневањата за криминалот и авантата на Владата на Заев и Рашковски и печалењето пари на грбот на граѓаните кои се враќаат во својата татковина“,
рече Арсовски на денешната прес-конференција.
Тој вели дека во изнесените пораки до јавноста постои сериозен сомнеж за криминал и воено профитерство во кризни моменти кога се работи за здравјето и безбедноста на граѓаните.
„Секогаш кога ќе има сериозни сомнежи за криминал од страна на Владата, бидејќи се работи за граѓаните и државата, ќе вршиме притисок во рамките на можностите да не се врши грабеж на маката на граѓаните. Изминативе два дена имаше стотици сведоштва од граѓани докази кои се вратиле во државава со превоз организиран од Владата, кој се нарекува хуманитарен, а не е бидејќи граѓаните сами си го плаќаат превозот и враќањето во државата, сите сведоштва, дел од нив и јавни лица од јавниот живот познати на целата држава кои сведочеа за нечовечките услови со кои се третираат граѓаните на патот од аеродром или од граница до карантин“,
додаде Арсовски.
*поврзана вест Владата објави пораки од Христијан Мицкоски до Драги Рашковски и го обвини за притисок врз институциите