Лидерот на ВМРО-ДПМНЕ, Христијан Мицкоски, преку социјалните мрежи се огласи за случувањата во Израел и го осуди испалувањето ракети од појасот Газа кон израелското население. Израел, вели тој, има право да се брани од терористичката организација Хамас.
„Внимателно ја следиме состојбата во Израел, значајното зголемување на насилствата, вклучително и постојаниот напад од ракетен оган од појасот Газа кон Израел. Испалувањето на ракети од Газа насочени кон цивилното население на Израел е целосно неприфатливо и дополнително ги зголемува тензиите во регионот. Истовремено го издвојуваме правото на Израел за заштита и одбрана на своето население и територија од нападите на терористичката организација Хамас. Апелираме кон политичките лидери во Израел и во регионот да продолжат со вложување на искрени напори за деескалација на судирите и одлучно да дејствуваат против екстремизмот кој создава сериозни безбедносни проблеми и го загрозува животот на цивилното население“,
вели Мицкоски во ставот кој го објави на социјалните мрежи.
Истовреме, партијата изразува и сочувство за изгубените животи и очекува смирување на состојбите.
Судирите меѓу Израел и Палестинците траат веќе петти ден, а досега на палестинската страна загинале повеќе од 100 луѓе и осум на израелската.
Хамас е најмоќната милитантна група во Газа, а судирите со израелските власти траат веќе пети ден. Според достапните информации, во пресметките досега загинале околу 130 луѓе од палестинска, и десетина од израелска страна.