„Пред да поченеме да водиме посериозни разговори, ВМРО-ДПМНЕ и коалицијата ‘Твоја Македонија’ треба да консолидираат 61 пратеник Дали ќе успееме, не знам. Дали ќе се обидеме да успееме, ќе дадеме се од себе. Има најави од голем број нови членови во парламентот кои се подготвени да ги поддржуваат политиките на идната влада предводена од ВМРО-ДПМНЕ“, рече вечерва лидерот на ВМРО-ДПМНЕ
Со резултатот што го направи коалицијата „Вреди“ од 107 илјади гласа го потврди својот кредибилитет и може да биде кредибилен партнер во идната Влада која ќе ја предводи коалицијата „Твоја Македонија“, на чело со ВМРО-ДПМНЕ и мене како мандатар.
Ова вечерва во емисијата „Само интервју“ на Канал 5 го рече лидерот на ВМРО-ДПМНЕ, Христијан Мицкоски, одговарајќи на прашањето дали по вчерашниот изборен резултат на парламентарните избори е извесно дека коалицијата „Вреди“ ќе биде нивен коалициски партнер. Тој рече дека до 28 мај (конституирање на Собранието, н.з.) е можно да консолидираат 61 пратеник, зашто имаат такви сигнали од поединци од другите коалиции кои можат да се приклонат кон нив. Така, заедно со „Вреди“, рече Мицкоски, би имале 74 или 75 пратеници.
„Нашата цел е да имаме како влада поддршка од две третини во парламентот. Тоа ни е потребно да направиме реконструирање во самата влада, во самиот владин кабинет за да можеме да одговориме на потребите на граѓаните и на новото време. Овој состав на владиниот кабинет е повеќе од две и пол или три децении. За да немаме министри без ресор и да им доделуваат нови ингеренции. Ако сакаме сериозна борба против криминалот и корупцијата, треба да имаме поголема транспарентност и отчетност, но и динамична размена на податоци меѓу граѓаните и администрацијата“,
рече Мицкоски.
Најави формирање на ново министерство за дигитална трансформација, кое ќе делува во рамките на досегашното Министерство за информатичко општество, но ќе биде преименувано со проширени ингеренции, за што рече дека е негова лична амбиција.
„Потребно е и ново министерство во рамките на владиниот кабинет, а тоа е министерство за енергетика, здравство и минерални суровини. Имајќи ги во предвид дека енергетиката ќе биде предизвик и во времето кое доаѓа, ако немаме јасен план, повторно ќе бидеме неподготвени како во периодот на енергетската криза“,
вели лидерот на ВМРО-ДПМНЕ.
Одговарајќи на прашањето дали со ЗНАМ и со Левица би разговарале да бидат дел од владата или да ги поддржат нивните најавени проекти во Собранието, Мицкоски рече дека разговорите би се воделе во два правци, односно би разговарале со сите партии кои се дел од опозицијата, како и со сите пратеници за, како што додаде, визиите и за политиките кои идната влада планира да ги спроведува.
Сепак, рече и дека не очекува дека ДУИ ќе направи промена во нивните позиции и дека би можеле да ги поддржат нивните политики и дека, како што посочи, би настанал пресврт во нивната политика.
„На секого ќе му дадеме шанса. Не смееме да ги повторуваме грешките кои ги правеше оваа влада, која се однесуваше игнорантски кон поголемите политички партии, меѓу кои спаѓа и ВМРО-ДПМНЕ. Тие се однесуваа дека ако имаат 61 пратеник, имаат се. Така не функционера демократијата. Мора да имате разбирање и со опозицијата за некои процеси, па дури и да излезете во пресрет на некои барања. Мора да сме зрели и да ги ослободиме граѓаните од притисоците во кои живееме“,
вели тој.
На новинарска констатација дека не ја затвораат вратата да има и трет коалиционен или четврт партнер, покрај „Вреди“, лидерот на ВМРО-ДПМНЕ посочи дека не ја затвораат вратата за членови на парламентот, политички партии кои ќе ги поддржуваат политиките кои се дел од предизборната програма „Платформа 1198“.
„Нашиот сигурен партнер е коалицијата ‘Вреди’“,
рече тој.
За актуелното раководство на ДУИ, Мицкоски рече дека нема поврзана точка, односно дека Али Ахмети се опкружил со луѓе кои го однеле во погрешен правец. Повтори и дека е решен со ДУИ да не коалицираат.
„Станува збор за коалиција која во својата структура има политички партии кон се дел од другите етнички заедници кои имаат свои претставници. Во целиот овој мозаик вистински претставник на албанската етничка заедница во Македонија е коалицијата ‘Вреди‘. Тие за прв пат покажаа едно поинакво ниво и освоија 107 илјади гласа. Освоија и повеќе гласови од било кога на политичката сцена во Македонија кога се профилирала опозиција на албанските партии“,
вели Мицкоски.
Мицкоски најави дека утре ќе имаат состанок со претставници на политичките партии кои се дел од коалицијата „Твоја Македонија“, на која би сакал да го слушне и нивното мислење за идната коалициска влада.
„Ние сме едно семејство и затоа треба да разговараме. Неформални комуникации постојат и сега со коалицијата ‘Вреди’. Но, за нешто да биде посериозно, прво треба ние во рамките на коалицијата ‘Твоја Македонија’ да добиеме одобрување за ВМРО-ДПМНЕ да ги води тие преодовори и разговори. Па, потоа да одбереме луѓе кои преговараат, нешто што треба да помине и кај органите на партијата“,
рече лидерот на ВМРО-ДПМНЕ.
За да се влезе во какви били преговори и разговори, тој смета дека приоритет треба да им биде да консолидираат 61 пратеник.
„Пред да поченеме да водиме посериозни разговори, ВМРО-ДПМНЕ и коалицијата ‘Твоја Македонија’ треба да консолидираат 61 пратеник. Дали ќе успееме, не знам. Дали ќе се обидеме да успееме, ќе дадеме се од себе. Има најави од голем број нови членови во парламентот кои се подготвени да ги поддржуваат политиките на идната влада предводена од ВМРО-ДПМНЕ“,
вели тој.
Рече и дека на вчерашните избори освоиле 58 пратеници, односно добиле незапаметен број гласови, и тоа, според него, од позиција на опозиција, но додаде и дека овој историски резултат многу тешко понатаму некогаш би се повторил.